| पनवेल | प्रतिनिधी |
राज्यातील लेडीज बार संस्कृती ज्या पनवेल मधील अतिरेकरा मुळे बंद झाली होती त्याच पनवेल मध्ये ही विकृत संस्कृती पुन्हा उफाळून आल्याचे दिसून येत आहे. आसूडगाव येथील इंटरनेट या लेडीज सर्व्हीसबारमध्ये मध्यरात्री टाकलेल्या धाडीत आंबटशौकिनांना पोलिसांनी अटक केली आहे.
मध्यरात्री पावणेदोन वाजता दिवाळीची मौजमज्जा करण्यासाठी गेलेल्या 20 गि-हाईकांना पहाटेपर्यंत पोलीसांच्या कारवाईला सामोरे जावे लागले. पोलीसांच्या छापेसत्रात 22 महिला वेटर या पुरुष ग्राहकासोबत अश्लिल व बिभस्त वर्तन करताना आढळल्याने ही कारवाई करण्यात आली.
पनवेलमध्ये 35 हून लेडीज सर्व्हीस बार आहेत. आसूडगाव येथील इंटरनेट बार अँड रेस्ट्रोरेन्टमध्ये तळ मजला आणि पहिल्या मजल्यावर असे वेगवेगळे तीन ठिकाणी क्रेस्ट्रा बार आणि व्हीआयपी लेडीज सर्व्हीसबार आहेत. राज्य उत्पादन शुल्क विभागाने या बारमध्ये महिला वेटरसाठी नोकरनामे दिले असून या नोकरनाम्यांचा कालावधी रात्री साडेनऊ पर्यंतच असल्याचे राज्य उत्पादन विभागाने स्पष्ट केले आहे.
बार मालकांची शक्कल
सध्या लेडीज सर्व्हीसबारचे मालक व चालकांनी पहाटेपर्यंत बार चालविण्यासाठी अनोखी शक्कल लढविली आहे. महिला नोकरनाम्यांचा कालावधी रात्री साडेनऊ वाजता संपल्यानंतर पोलीसांकडून ऑकेस्ट्रा बारची (मनोरंजन) परवानगी घेऊन हे बार पहाटेपर्यंत चालविले जातात. लेडीज सर्व्हीसबारमध्ये बाजारात मिळणारी 20 रुपयांची थंडपेयाची 300 मिलीलीटरची बाटली 600 रुपयांना विक्री केली जाते. तर बाजारात अडीचशे रुपयांची बियर 1100 रुपयांना मिळते.
नवी मुंबई पोलीस दलाच्या हद्दीत सर्वाधिक लेडीज सर्व्हीसबार सीबीडी बेलापूर, शिरवणे आणि पनवेल तालुका पोलीस ठाण्यांच्या हद्दीत आहेत. बेलापूर हे सर्वच मोठ्या सरकारी व खासगी कंपन्यांच्या कार्यालयांचे केंद्र असल्याने या परिसरात मोठ्या प्रमाणात व्यापारी व नोकरदारांची संख्या मोठी आहे. उरण येथील जेएनपीटी बंदरातील व्यापारी सुद्धा बेलापूर येथील याच लेडीज सर्व्हीसबार संस्कृतीकडे आकर्षित झाल्याचे अनेकदा पाहायला मिळते. बेलापूरमध्ये सर्वाधिक बार असल्याने या परिसराला रात्री थायलंड मधील बँकॉक शहराचा परिसर अशी उपरोधिक उपमा दिली गेली आहे. त्यामुळे या पोलीस ठाण्यांच्या प्रभारी पदाला तेवढीच अर्थप्रतिष्ठा प्राप्त झाल्याचे चर्चा परिसरात आहे.