जिल्हा उपनिबंधकांचा लेखापरीक्षक नियुक्ती बाबत आढावा

। अलिबाग । विशेष प्रतिनिधी ।
जिल्हा उपनिबंधक डॉ.सोपान शिंदे यांनी तालुका सहाय्यक निबंधक व तालुका लेखापरीक्षक यांची माहे फेब्रुवारी 2022 अखेरचे सन 2020-21 या कालावधीचे जिल्ह्यातील सहकारी संस्थांचे वैधानिक लेखापरीक्षण पूर्ण करणे आणि सन 2021-22 या कालावधीचे लेखापरीक्षणासाठी लेखापरीक्षकाची ठरावाने नियुक्ती विषयाबाबत आढावा घेतला.
तालुकानिहाय माहिती नुसार एकूण लेखापरीक्षण करावयाच्या ठरावाने 2 हजार 235 व परंतुकान्वये 3 हजार 397 अशा एकूण 5 हजार 632 संस्थांपैकी माहे फेब्रुवारी 2022 अखेर ठरावान्वये 1 हजार 919 संस्था व परंतुकान्वये 873 संस्था अशा एकूण 2 हजार 792 संस्थांचे वैधानिक लेखापरीक्षण पूर्ण झालेले असून उर्वरीत शिल्लक पैकी ठरावान्वये 316 व परंतुकान्वये 2 हजार 524 अशा एकूण 2 हजार 840 संस्थांचे वैधानिक लेखापरीक्षण पूर्ण झाले नसल्याचे निदर्शनास आले.2021-2022 या कालावधीचे वैधानिक लेखापरीक्षणासाठी 31 मार्च 2021 अखेरच्या अपेंडिक्सप्रमाणे लेखापरीक्षणास पात्र असलेल्या एकूण 5 हजार 946 संस्थापैकी फक्त 762 संस्थांनीच लेखापरीक्षकांची ठरावाने नियुक्ती केली असून उर्वरीत एकूण 5 हजार 184 संस्थांनी लेखापरीक्षकाची नियुक्ती करणे बाकी असल्याचे निदर्शनास आले.
जिल्ह्यातील सर्व सहकारी संस्थांनी 31 मार्च 2022 अखेर सन 2020-21 वैधानिक लेखापरीक्षण 100 टक्के पूर्ण करून घ्यावे. सन 2021-22 या कालावधीचे लेखापरीक्षण करण्यासाठी लेखापरीक्षकांच्या ठरावाने नियुक्त्या करण्याची मुदत 31 मार्च 2022 पर्यंत असल्याने संस्थेने वार्षिक सर्वसाधारण सभा किंवा संचालक मंडळ सभेमध्ये निबंधकाच्या नामतालिकेवरील पात्र लेखापरीक्षकाची नियुक्ती करून याबाबतचा ठराव व लेखापरीक्षकाचे संमतीपत्र 4 एप्रिल 2022 पर्यंत तालुका सहाय्यक निबंधक व तालुका लेखापरीक्षक कार्यालयाकडे दाखल करावेत, असे आवाहन केले आहे.