Alibag Accident: रिक्षा-कारचा अपघात

| रायगड | जिल्हा प्रतिनिधी |

अलिबाग-बेलकडे मार्गावर शुक्रवारी दुपारी रिक्षा आणि कारचा भीषण अपघात झाला. या अपघातामध्ये रिक्षाचे प्रचंड नुकसान झाले. सुदैवाने जीवितहानी टळली. दरम्यान, या अपघाताच्यावेळी वाहतूक कोंडी झाली होती. मात्र, वाहतूक पोलिसांनी घटनास्थळी धाव घेऊन ही कोंडी सुरळीत करण्याचा प्रयत्न केला. रस्त्याच्या मधोमध असलेली दोन्ही वाहने बाजूला घेऊन दोन्ही मार्गावरील वाहतूक पूर्ववत सुरु ठेवण्यावर भर दिला.

मिळालेल्या माहितीनुसार, बेलकडेकडून अलिबागकडे रिक्षा घेऊन चालक जात होता. दरम्यान, शुक्रवारी (दि.29) दुपारी कुरुळ-अलिबाग बेलकडे फाट्याजवळ आल्यावर रिक्षा आणि कारची जोरदार धडक झाली. या धडकेत रिक्षाच्या समोरील भागाचा चेंदामेंदा झाला. सुदैवाने रिक्षाचालक बचावला. या अपघातामध्ये कोणीही जखमी नसल्याची माहिती समोर येत आहे. कारच्या धडकेेने हा अपघात झाल्याचा प्राथमिक अंदाज व्यक्त करण्यात येत आहे. अपघात झाल्यावर दोन्ही मार्गावरील वाहतूक काही वेळ ठप्प झाली होती. या घटनेची माहिती मिळताच वाहतूक पोलिसांनी घटनास्थळी धाव घेतली. स्थानिकांच्या मदतीने दोन्ही वाहने रस्त्याच्या बाजूला घेऊन दोन्ही मार्गावरील वाहतूक सुरळीत करण्यात आली.