चणेरा नाक्याजवळ बुधवारी रास्ता रोको

| रायगड | जिल्हा प्रतिनिधी |

करोडो रुपयांचा निधी खर्च होऊनही रस्त्याचे काम अपूर्ण स्थितीत आहे. त्याचा नाहक त्रास चणेरा-पांगळोली-उसर मार्गे रोहामधील नागरिकांसह प्रवाशांना होत आहे. या रस्त्याचे काम पुर्ण करण्याचे फक्त आश्वासने देण्यात आली आहेत. प्रत्यक्षात मात्र काम पूर्ण करण्यास रोहा सार्वजनिक बांधकाम विभाग उदासीन ठरले आहे. त्यामुळे संतप्त झालेले नागरिक रस्त्यासाठी बुधवारी (दि.17) जनआक्रोश करणार आहेत. चणेरा नाक्याजवळ सकाळी 10.00 वाजता रास्ता रोको आंदोलन करणार असल्याची माहिती चणेरा रहिवासी ज्येष्ठ नागरिक संघाचे अध्यक्ष प्रकाश विचारे यांनी दिली आहे.

प्रकाश विचारे यांच्याकडून मिळालेल्या माहितीनुसार, अलिबाग-रोहा मार्गावरील चणेरा- पांगळोली-उसर मार्गे रोहा हा प्रमुख जिल्हा मार्ग असल्याने महत्वाचा आहे. तसेच, हा रस्ता म्हसळा, हरेश्वर, अलिबागकडे ये-जा करणाऱ्यांना फायदेशीर ठरणार आहे. या रस्त्यासाठी राज्य शासनाच्या अर्थसंकल्पात 2021 मध्ये 5 कोटी रुपयांची तरतूद करण्यात आली. त्यानंतर या रस्त्याचे डांबरीकरण व रुंदीकरणाचे काम सार्वजनिक बांधकाम विभागाकडून करण्यात आले. हे काम सिद्धिविनायक कंपनीला देण्यात आले आहे. मात्र, सुमारे साडेनऊ किलोमीटरच्या डांबरी रस्त्याच्या कामासाठी करोडो रुपये खर्च करण्यात आले आहे. त्यासाठी तीन देयके ठेकेदाराला दिल्याचा आरोप करण्यात आला आहे. परंतु, हा रस्ता अजूनही अपुर्णावस्थेत आहे. त्यामुळे अनेक वेळा सार्वजनिक बांधकाम विभागाकडे पाठपुरावा करून रस्त्याचे काम तातडीने पुर्ण करा, अशी मागणी करण्यात आली. अनेक वेळा आंदोलने केली आहे. यावेळी फक्त आश्वासनेच दिली जात असल्याचा आरोप विचारे यांनी केला आहे.

या रस्त्याच्या अपूर्ण कामामुळे नागरिकांना व दैनंदिन प्रवास करणाऱ्या प्रवाशांना प्रचंड त्रास होत आहे. याची जाणीव सार्वजनिक बांधकाम विभागाला करून दिली. परंतु, त्यांच्याकडून ठोस कार्यवाही दिसून आली नाही. या रस्त्याचे काम पुर्ण करण्यासाठी 31 मे 2025, 31 डिसेंबर 2025, 31 मार्च 2026 आणि 31 मे 2026, 1 जून 2026 आणि 15 जून 2026 रोजी अशी अनेक आश्वासने सार्वजनिक बांधकाम विभागाने दिली आहेत. काही आश्वासने लेखी स्वरुपात दिली, तर काही आश्वासने तोंडी दिली आहेत. त्यामुळे सार्वजनिक बांधकाम विभागाच्या या भोंगळ कारभाराविरोधात चणेरा रहिवासी ज्येष्ठ नागरिक संघाने आता आक्रमक भूमिका घेतली आहे. येत्या 17 जून रोजी सकाळी 10.00 वाजता चणेरा नाक्याजवळ रास्ता रोको केला जाणार असल्याचा इशारा प्रकाश विचारे यांनी दिला आहे. या आंदोलनात शेकडो नागरिक सहभागी होणार आहे.

रस्त्याच्या कामावर दृष्टीक्षेप
शासनाच्या अर्थ संकल्प रस्ता मंजूर - 2021
कार्यादेश - 2023
रस्त्याची लांबी - साडेनऊ किलो मीटर
कामाचे स्वरूप - खडीकरण, डांबरीकरण आणि मजबूतीकरण
कामाची स्थिती - पावणे सात किलो मीटरचा रस्त्याचे काम झाले आहे
सध्या अडीच कोटी रुपयांचा निधी खर्च झाला आहे.
रोहा येथील सिध्दीविनायक कंपनीला ठेका देण्यात आला आहे.