विमानतळाभोवती ‌‘ऑफिस स्पेस‌’ची झुंबड!

उलवे-पुष्पकनगरला कंपन्यांची पसंती; कार्गो, लॉजिस्टिक्समुळे व्यावसायिक हालचालींना वेग

| उरण | प्रतिनिधी |

नवी मुंबई आंतरराष्ट्रीय विमानतळावर प्रवासी सेवेसोबतच कार्गो वाहतुकीला चालना मिळत असल्याने विमानतळाभोवती व्यावसायिक हालचालींना वेग आला आहे. कार्गो, लॉजिस्टिक्स, निर्यात-आयात, सीमाशुल्क आणि मालवाहतूक क्षेत्रातील कंपन्यांकडून कार्यालयांसाठी जागांचा शोध सुरू असल्याने उलवे, पुष्पकनगर आणि द्रोणागिरी परिसरातील व्यावसायिक जागांना आगामी काळात मागणी वाढण्याची शक्यता आहे.

विमानतळावर औषधे, नाशवंत व शीतसाखळीतील माल तसेच अवजड माल हाताळण्यासाठी सुविधा विकसित करण्यात आल्या आहेत. कॅथे कार्गोने मुंबईतील मालवाहतूक सेवा नवी मुंबई विमानतळावर हलवून हाँगकाँगसाठी आठवड्यातून तीन मालवाहू उड्डाणे सुरू केली आहेत. तसेच फेडएक्सकडून सुमारे तीन लाख चौरस फुटांचे स्वयंचलित मालवाहतूक केंद्र उभारले जात आहे. विमानतळासोबतच जेएनपीए, औद्योगिक क्षेत्रे आणि महामार्गांची जवळीक यामुळे परिसराचे व्यावसायिक महत्त्व वाढत आहे. कार्गो एजंट, ट्रान्सपोर्टर, गोदामे, निर्यात-आयात कंपन्या आणि पूरक व्यवसायांना कार्यालयीन जागांची गरज वाढण्याची शक्यता आहे. त्यामुळे विमानतळावर विमानांची वर्दळ वाढण्याआधीच उलवे-पुष्पकनगर-द्रोणागिरीच्या व्यावसायिक क्षेत्राला नवे ‌‘टेकऑफ‌’ मिळण्याची चिन्हे दिसत आहेत.