सिनेमास्टाईल रंगला थरार
। अलिबाग । विशेष प्रतिनिधी ।
चोरी करण्याच्या मनसुब्याने आलेल्या चार चोरटयांना येथेच्छ प्रसाद देत सहाणगोठी ग्रामस्थांनी पकडून पोलिसांच्या ताब्यात दिले. या चोरटयांकडे 8 मोबाईल, रिक्षा तसेच हत्यार आणि दिवाळीतील पिस्तूल आढळली आहे. सकाळी दोघेजण सहाणगोठी ग्रामस्थांच्या हातात सापडल्यानंतर दोघे जण पळून जाण्यात यशस्वी ठरले होते. मात्र ग्रामस्थांनी जंगलभागात शोध मोहिम राबवून त्यांनाही शोधून काढत पोलिसांच्या स्वाधीन केले आहे. त्यांची चौकशी सुरु असून अट्टल चोरेटे असणार्या या चौघांनी पनवेल परिसरात चांगलाच हात मारला असल्याचे पोलिस सुत्रांनी सांगितले.
याबाबतचे वृत्त असे की, अजित देशमुख, विवेक पाटील हे दोन आरएसपीचे दोन कर्मचारी आज 1 नोव्हेंबर रोजी सकाळच्या सुमारास वडखळ येथून ड्यूटी संपवून अलिबागकडे येत होते. त्यावेळी त्यांना रस्त्यात त्यांना एक संशयास्पद रिक्षा आढळून आली. त्यामुळे या दोन पोलिसांनी त्या रिक्षाचा पाठलाग सुरु केला. आपला पाठलाग होत असल्याचे लक्षात येताच चोरट्यांनी रिक्षाचा वेग वाढवला. मात्र चिकाटी न सोडता दोघांनीही त्यांचा शेवटपर्यंत पाठलाग सुरुच ठेवला. सहाणगोठीपर्यंत आल्यानंतर मात्र या चोरटयांनी गावाजवळच रिक्षा उभी करुन पळून जाण्यात यशस्वी ठरले. यासार्या प्रकाराची माहिती अजित देशमुख, विवेक पाटील या दोघांनी गावकर्यांना देऊन त्यांचा शोध घेण्यास सांगितले. आणि अलिबाग पोलीस ठाण्यात जाऊन तिथे माहिती दिली. ग्रामस्थांनी पुर्ण गावाच्या परिसर पिंजून काढण्यास सुरुवात केली असता दोन चोरटे आढळून आले. त्यांना यथेच्छ हाताबुक्याचा प्रसाद देत ग्रामस्थांनी पोलिसांच्या ताब्यात दिले. त्यांच्या ताब्यात पोलिसांनी आठ मोबाईल फोन तसेच हत्यारे जप्त केली आहेत. मात्र आणखी दोघेजण पळून जाण्यात यशस्वी ठरले होते. सहापणगोठी ग्रामस्थांनी शोध मोहिम तीव्र केल्यानंतर जंगलभागात हे दोघे आढळून आले. त्यानंतर त्यांनाही अलिबाग पोलिसांच्या स्वाधीन करण्यात आले. पोलिसांनी आपला खाक्या दाखवत त्यांची चौकशी सुरु केली असून त्यांनी पनवेल परिसरात अनेक चोर्या केल्या असल्याचे समजते. अधिक तपास सहायक पोलिस निरीक्षक नवनाथ लहांगे करीत आहेत.