महसुल विभागासह रेल्वे प्रशासनाचे दुर्लक्ष
| नेरळ | वार्ताहर |
मुंबई ट्रान्स हार्बर रेल्वे मार्गाचे विस्तारीकरण पनवेल, कर्जतपर्यंत करण्यात आले आहे. या मार्गावर दोन बोगदे निर्माण केले जात आहेत. बोगद्याचे बांधकाम करताना त्यातून निघणाऱ्या दगड, मातीवर रेल्वे विकास प्राधिकरणाची मालकी आहे. मात्र असे असताना येथील दगड, मातीची विक्री राजरोसपणे सुरु आहे. महसुल विभागसह रेल्वे प्रशासनाचे लाखो रुपयांचे आर्थिक नुकसान होत असल्याने संबंधितांवर कारवाई करण्यात यावी, अशी मागणी करण्यात येत आहे.
एप्रिल 2023 पासून येथे काम सुरु असून उत्खनन केलेली माती आणि दगड यांची विक्री केली जात आहे. त्यावर रेल्वे आणि महसूल विभागाचे नियंत्रण नसल्याचे दिसून येते. पनवेल-कर्जत या मार्गावर 2005 पासून एकेरी वाहतूक सुरु असून उपनगरीय लोकल सेवा सुरु करण्यासाठी आणखी एक नवीन मार्ग बांधला जात आहे. पनवेल-कर्जत या 29 किलोमीटर लांबीच्या नवीन रेल्वे मार्गासाठी मुंबई रेल्वे प्राधिकरणाकडून शेतकऱ्यांच्या जमिनीचे संपादन करण्यात आल्या आहेत. त्यामुळे संपादीत केलेल्या जमिनीवर रेल्वेची मालकी आहे. या मार्गावर जे दोन बोगदे खोदले जात आहेत. त्यांची मालकी देखील मध्य रेल्वे प्रशासनाची आहे. या बोगद्याचे खोदकाम करताना त्यातून निघणारी माती आणि दगड यांच्यावर देखील रेल्वेचा हक्क आहे. मात्र किरवली आणि वावर्ले या बोगद्यातून निघणाऱ्या दगड आणि मातीची विक्री सुरु आहे. संबंधित ठेकेदार कंपन्यांनी याकडे लक्ष देण्याची गरज आहे, मात्र त्यांच्याकडून दुर्लश होत असल्याचे दिसून येते. याबाबत महाराष्ट्र नवनिर्माण सेनेकडून आवाज उठविण्यात आला आहे. मनसेचे रायगड जिल्हा अध्यक्ष आणि मनसे रेल्वे युनिट अध्यक्ष जितेंद्र पाटील यांनी याबाबत मुंबई येथे मध्य रेल्वे व्यवस्थापक आणि रेल्वे बोर्ड यांना निवेदन दिले आहे. रेल्वेच्या मालमत्तेची गैर पद्धतीने विक्री केल्याबाबद्दल संबंधित कामाची जबाबदारी असलेले रेल्वे अधिकारी आणि संबंधित ठेकेदार यांच्यावर कारवाई करण्यात यावी अशी मागणी त्यांनी निवेदनाद्वारे केली आहे.
किरवली येथे सुरू असलेल्या बोगद्याच्या कामाबद्दल स्थानिक महसूल प्रशासनाने देखील डोळ्यावर झापडे ओढल्याचे चित्र आहे. त्यांनी कारावाई करावी अशी मागणी काही ग्रामस्थांनी केली आहे.
तीन बांधकाम कंपन्या मिळून हा प्रकल्प राबवत आहेत. या माध्यमातून निघणारे दगड, माती असे सर्व साहित्य याच ठिकाणी रेल्वे मार्ग बनविण्यासाठी वापरण्यात येत आहे.
रमेश गाढवे, व्यवस्थापक ठेकेदार कंपनी
आमच्याकडून या ठिकाणी बोगद्यामधून काढण्यात आलेले सर्व दगड हे बाजूच्या क्रशिंग मशीनवर पाठवण्यात येतात. तेथे काँक्रिटचा माल बनवून आम्ही बोगद्यातील रेल्वे मार्गाच्या कामासाठी वापरतो. त्यामुळे बोगद्यातून काढण्यात आलेले साहित्य हे बाहेर कुठेही पाठवले जात नाही.
लक्ष्मण जनपांगे, मध्य रेल्वेचे अधिकारी
आमच्या कार्यालयातील नेरळ तलाठी यांनी पंचवटी भाग तसेच ममदापूर भागात साठा करून ठेवलेल्या दगडांची पाहणी करून पंचनामा केला आहे. त्याबाबत दंडात्मक कारवाई अद्याप झालेली नाही.
संतोष जांभळे, महसूल मंडळ अधिकारी, नेरळ