चौलमध्ये लम्पीची तीन संशयित जनावरे; जिल्ह्यात लसीकरण सुर
| अलिबाग । विशेष प्रतिनिधी ।
रायगड जिल्ह्यातील कर्जत तालुक्यात लम्पी स्कीनचा शिरकाव झाल्यानंतर आता कर्जत, रोहा आणि अलिबाग तालुक्यातील 10 संशयीत जनावरांचे नमुने तपासणीसाठी प्रयोगशाळेत पाठविण्यात आले आहेत. दरम्यान, अलिबाग तालुक्यांतील चौल जाखमाता येथील तीन जनावरांमध्ये लम्पी स्कीनची लक्षणे आढळून आली आहेत. सदर जनावरांचे नमुने तपासणीसाठी प्रयोगशाळेत पाठविण्यात आली आहेत. खबरदारी म्हणून येथे लसीकरण सुरू करण्यात आले असल्याचे पशु वैद्यकीय विभागाकडून सांगण्यात आले.
कर्जत तालुक्यात पाच जनावरांना लम्पीची लागण झाल्यानंतर एक जनावर दगावले असतानाच नव्याने रायगड जिल्ह्यातील अलिबाग, रोहा आणि कर्जत तालुक्यातील 10 जनावरांचे नमुने तपासणीसाठी प्रयोगशाळेत पाठविण्यात आल्याची माहिती पशुवैद्यकीय विभागाचे आयुक्त डॉ आर. बी. काळे यांनी दिली. कर्जत तालुक्यातील बेडीस, कशेळे, अलिबाग तालुक्यातील चौल जाखमाता तसेच रोहा तालुक्यातील सुतारवाडी परिसरातील येरळ ग्रामपंचायत हद्दीत जनावरांमध्ये लम्पी स्कीनची लक्षणे आढळून आली आहेत. त्यामुळे त्यांचे नमुने तपासणीसाठी पाठविण्यात आली आहेत. जिल्हा परिषदेचे मुख्य कार्यकारी अधिकारी डॉ. किरण पाटील यांच्या सुचनेनुसार ज्या ज्या भागात लक्षण आढळली आहेत त्या भागात 5 किलोमीटरच्या क्षेत्रातील जनावरांचे लसीकरण सुरु करण्यात आले असल्याचे सांगण्यात आले. यापूर्वी जिल्ह्याला 10 हजार लसींचा पुरवठा करण्यात आला होता आता त्यात वाढ करण्यात येऊन 30 हजार लसींचे डोस उपलब्ध असल्याचे डॉ काळे यांनी सांगितले.