श्रीवर्धनच्या खाडीत आढळला समुद्री घोडा

| रायगड | खास प्रतिनिधी |

श्रीवर्धन तालुक्यातील काळिंजेच्या खाडीत स्थानिक मच्छिमार अनीस फणसोपकर यांना दुर्मीळ समुद्री घोडा सापडला. ही बाब लक्षात येताच त्याला त्यांनी जाळ्यातून बाहेर काढत पुन्हा खाडीत सोडले. या आधी देखील अशी विविध प्रकारची जैवविविधता या ठिकाणी आढळून आल्याचे स्थानिकांचे म्हणणे आहे.

श्रीवर्धन तालुक्यापासून 13 किमी अंतरावरील काळिंजे गावामध्ये 190 हेक्टर क्षेत्रावर कांदळवन पसरले आहे. या बेटावर मलईयुक्त क्षेत्र आहे. येथील स्थानिकांचा मासेमारी हा प्रमुख व्यवसाय आहे. मच्छीमार अनीस फणसोपकर खाडीत मासेमारी करत असताना त्यांना जाळ्यात समुद्री घोडा आढळला. जाळ्यात नारंगी रंगाचा समुद्री घोडा आढळल्याची माहिती फणसोपकर यांनी दिली. त्यांनी लागलीच या समुद्री घोड्याला जाळ्याबाहेर काढले आणि याची माहिती कांदळवन प्रतिष्ठानाचे सहाय्यक संशोधक मोहन उपाध्ये यांना दिली. त्यांनी या समुद्री घोड्याची पाहणी करुन फणसोपकर आणि विक्रांत गोगरकर यांच्या मदतीने पुन्हा त्याला खाडीत सोडले. या समुद्री घोड्याची लांबी 13 सेमी होती. समुद्री घोडा हा भारतीय वन्यजीव संरक्षण कायद्याअंतर्गत संरक्षित असून वाघाला ज्या प्रकारे संरक्षण आहे, तसेच त्यालाही देण्यात आले आहे.

समुद्र घोड्याचा आकार इंग्रजी एस अक्षराप्रमाणे असतो. मासा या प्रकराता तो मोडत असला, तरी तो माशासारखा दिसत नाही. शास्त्रीयदृष्ट्या हा जलचर हिप्पोकॅम्पस या गटातील आहे. तो बॉनी प्रकारातील मासा असून त्याच्या पन्नासहून अधिक प्रजाती आहेत. माशाप्रमाणे त्याच्यावर खवले आढळून येत नाहीत. समुद्र घोडे हे उभे पोहतात. समुद्र घोड्याची उत्क्रांती ही पाइप माशापासून झाल्याचे शास्त्रज्ज्ञाचे म्हणणे आहे.