अमिषा बामणेची अंडर 19 क्रिकेट टीममध्ये निवड

। सुधागड -पाली । वार्ताहर ।
सुधागड तालुक्यातील आपटवणे या छोट्याशा गावातील अमिषा बामणे हिची रायगड जिल्हा क्रिकेट असोसिएशनच्या अंडर 19 क्रिकेट टीममध्ये निवड झाली आहे. प्रतिकूल परिस्थितीवर मात करत जिद्द व कठोर मेहनतीच्या जोरावर आणि प्रशिक्षकांच्या मार्गदर्शनाने अमिषाने हे यश मिळविले आहे. या यशाबद्दल तिचा पाली-सुधागड तहसीलदार दिलीप रायण्णावर यांच्या हस्ते मंगळवारी (दि.6) सन्मान करण्यात आला.

अमिषा पालीतील ग. बा. वडेर हायस्कुल तसेच व.ग. ओसवाल कनिष्ठ महाविद्यालयामध्ये इयत्ता 11 वीत शिकत आहे. आत्तापर्यंत जिल्ह्याच्या क्रिकेट टीममध्ये निवड झालेली अमिषा ही तालुक्यातील एकमेव मुलगी आहे. क्रिकेटच्या सरावासाठी आपटवणे गावातून रोज चालत ती पालीला येते. तिच्या या कठोर परिश्रमाचे चीज झाले आहे. महाराष्ट्र क्रिकेट असोसिएशनच्या नुकत्याच झालेल्या अंडर 19 वुमन 20-20 लीगमध्ये तीने जिल्ह्याच्या टीममधून उत्तम कामगिरी केली आहे. तिच्या या निवडीबद्दल मान्यवरांसह तालुक्यातील नागरिकांनी तिचे कौतुक केले आहे.