सदस्यपदांच्या तीन जागांसाठी सात उमेदवार

28 एप्रिलला मतदान, तर 29 एप्रिलला मतमोजणी होणार

| रायगड | जिल्हा प्रतिनिधी |

अलिबाग तालुक्यातील तीन ग्रामपंचायतींच्या सरपंच व सदस्यपदांची निवडणूक बिनविरोध झाली आहे. त्यामुळे उर्वरित तीन ग्रामपंचायतींच्या तीन सदस्यपदांच्या जागांसाठी निवडणूक होणार आहे. या निवडणुकीच्या रिंगणात सात उमेदवार असून, मंगळवारी (दि.28) सकाळी साडेसात वाजल्यापासून मतदानाला सुरुवात होणार आहे.

अलिबाग तालुक्यातील नवेदर नवगाव, कोप्रोली, रेवदंडा, वैजाली, खंडाळे, नागाव या सहा ग्रामपंचायतींच्या पोटनिवडणुकांचा कार्यक्रम जाहीर करण्यात आला. शनिवारी (दि.4) ते सोमवारी (दि. 13) या कालावधीत उमेदवारी अर्ज दाखल करण्यात आले. नवेदर नवगाव या ग्रामपंचायतीच्या सरपंचपदासाठी शेकापच्या अंकिता जैतू यांचा एकमेव अर्ज दाखल झाल्याने त्या बिनविरोध निवडून आल्या आहेत. तसेच कोप्रोली व रेवदंडामध्ये सदस्य पदासाठी प्रत्येकी एकच अर्ज दाखल झाल्याने ही निवडही बिनविरोध झाली. वैजाली, खंडाळे व नागाव या ग्रामपंचायतीच्या तीन सदस्यपदाच्या जागांसाठी वेगवेगळ्या राजकीय पक्षातील उमेदवारांनी अर्ज भरले. त्यामध्ये वैजाली ग्रामपंचायतीच्या एक सदस्यपदासाठी दोन, नागावच्या एक सदस्यपदासाठी दोन आणि खंडाळेच्या एक सदस्यपदासाठी तीन उमेदवारी अर्ज दाखल झाले आहेत. त्यामुळे या तीन ग्रामपंचायतींच्या सदस्य पदासाठी निवडणूक होणार आहे. शुक्रवारी झालेल्या अर्ज माघार प्रक्रियेनंतर अंतिम उमेदवारांची यादी जाहीर करण्यात आली. आता प्रचाराला सुरुवात होणार आहे. 28 एप्रिल रोजी सकाळी साडेसात वाजल्यापासून मतदानाला सुरुवात होणार आहे. मतमोजणी दुसऱ्या दिवशी 29 एप्रिलला होणार आहे.