सांडपाणी व्यवस्थापन प्रकल्प नियोजनशून्य

राजकीय पक्षांकडून संतप्त भावना

| नेरळ | प्रतिनिधी |

माथेरान शहरातील सांडपाण्याचे व्यवस्थापन करण्यासाठी राज्य सरकारने सांडपाणी व्यवस्थापन प्रकल्प मंजूर केला आहे. तब्बल 47 कोटी रुपये खर्चाच्या या प्रकल्पाचे काम माथेरान शहरात वेगवेगळ्या ठिकाणी सुरू झाले आहे. माथेरानमध्ये खोदकाम करायला परवानगी नसताना रस्ते खोदण्यात आलेले आहेत. जागोजागी खड्डे पडले असून, या खड्ड्यांमुळे आणि मातीमुळे स्थानिक हैराण आहेत. मात्र, माथेरानमधील राजकीय पक्षदेखील आता नियोजन नसलेल्या कामाला विरोध करू लागले आहेत.

माथेरान शहरातील नागरी वस्ती आणि हॉटेल्समधील सांडपाणी हे डोंगरातून खाली दरीमध्ये जात असते. त्याबद्दल राज्य मानवी हक्क आयोग यांच्या हस्तक्षेपानंतर राज्य सरकारने माथेरानमधील सांडपाणी व्यवस्थापन प्रकल्पाचे काम मंजूर केले. त्याआधी गेली पाच वर्षे माथेरान सांडपाणी व्यवस्थापन प्रकल्पाची मागणी केली जात होती. परंतु, डिसेंबर 2023 मध्ये माथेरान सांडपाणी प्रकल्प मंजूर झाल्यावर 7 जानेवारी रोजी राज्याचे मुख्यमंत्री एकनाथ शिंदे यांच्या हस्ते ऑनलाईन भूमिपूजन करण्यात आले होते. शहराची भौगोलिक परिस्थिती लक्षात घेऊन या प्रकल्पाचे नियोजन आणि आराखडा तयार करणाऱ्या महाराष्ट्र जीवन प्राधिकरण यांनी शहरात वेगवेगळ्या सहा ठिकाणी प्रकल्प उभारण्याचे नियोजन केले. त्यानुसार शहरात एकच वेळी सर्व सहा ठिकाणी सांडपाणी व्यवस्थापन प्रकल्पाचे काम सुरू केले. त्यासाठी संबंधित ठेकेदार कंपनीने एकावेळी 300 कामगारांसह माथेरान गावातील मुख्य रस्ते, नागरी भागातील रस्ते या ठिकाणी पाईपलाईन टाकण्यासाठी खोदकाम केले. त्याचा परिणाम माथेरान शहरात जागोजागी खड्डे पडले आहेत, तर रस्त्यांवर माती पडली आहे. रस्ते खोदले असताना आणि पर्यटकांना त्रास होत आहे. माथेरानमधील सांडपाणी व्यवस्थापन प्रकल्पाचे काम नियमानुसार सुरू आहे की सर्व राजकीय पक्ष सोयीनुसार गप्प आहेत, अशीदेखील चर्चा माथेरान शहरात सुरू झाली आहे.

आम्ही सर्व माहिती मागवत असून, पालिका मुख्याधिकारी यांना भेटून सर्व वस्तुस्थिती सांगितली आहे. प्रकल्प शहरासाठी आवश्यक आहे, पण चुकीच्या नियोजनानुसार सुरू असलेले काम थांबले नाही तर रस्त्यावर उतरण्याचा इशारा दिला आहे.

कुलदीप जाधव, शहरप्रमुख, शिवसेना ठाकरे गट

आम्ही सांडपाणी व्यवस्थापन प्रकल्पाचे सुरू असलेल्या कामाबद्दल समाधानी नाही, मात्र पक्षातील सर्वांशी बोलून आक्रमक भूमिका घेण्याचे विचारात आहेत.

प्रवीण सकपाळ, अध्यक्ष, माथेरान शहर भाजप

या प्रकल्पाचे काम करण्यासाठी खोदण्यात आलेल्या खड्ड्यात रात्रीच्या वेळी अनेक ज्येष्ठ नागरिक पडले आहेत. त्यामुळे एखाद्या पर्यटकांचा किंवा स्थानिकांचा मोठा अपघात झाल्यास पालिकेला जबाबदार धरण्यात येईल. पूर्वी चुकीचे काम चालल्यावर तक्रारींचे ढीग पालिकेत जमा होत होते, आता सर्व चिडीचूप आहेत.

रत्नदीप प्रधान, अध्यक्ष, भारतीय कामगार सेना पालिका युनिट