उद्या पनवेलमध्ये धडकणार लाल वादळ

शेकापचा 78 वा वर्धापन दिन होणार साजरा

| पनवेल | प्रतिनिधी |

कार्यकर्त्यांना ऊर्जा देणारा शेतकरी कामगार पक्षाचा वर्धापन दिन सोहळा शनिवारी (दि. 2) सकाळी पनवेलमध्ये साजरा केला जाणार आहे. पक्षाचे हजारो कार्यकर्ते या मेळाव्यात सहभागी होणार आहेत. त्यामुळे शेकापचे ‌‘लाल वादळ’ पनवेलमध्ये धडकणार असून, यावेळी शेकापचे मोठे शक्तीप्रदर्शन होणार आहे. शेकापचे सरचिटणीस जयंत पाटील यांच्यासह महाविकास आघाडीमधील दिग्गज नेतेदेखील शेकापच्या वर्धापनदिना निमित्त शुभेच्छा देण्यासाठी उपस्थितीत राहणार आहेत. मनसे अध्यक्ष राज ठाकरे यांची या मेळाव्यास प्रमुख उपस्थिती असणार आहे. येणारी शेकडो वाहने उभी करण्यासाठी वाहनतळ, हजारो कार्यकर्त्यांना बसण्यासाठी खुर्च्यांची व्यवस्था, पिण्याच्या पाण्याची चोख व्यवस्था मेळाव्याच्या ठिकाणी करण्यात आली आहे. मेळावा यशस्वी करण्यासाठी कार्यकर्ते मागील काही दिवसांपासून दिवस-रात्र मेहनत घेत आहेत.

शेतकरी कामगार पक्षाचा 78 वा वर्धापन दिन शनिवारी साजरा होणार आहे. यानिमित्त तालुक्यातील नवीन पनवेल येथील गुरुद्वाराशेजारील मैदानात भव्य मेळाव्याचे आयोजन करण्यात आले आहे. शेतकरी कामगार पक्षाचे सरचिटणीस माजी आमदार जयंत पाटील, मनसे अध्यक्ष राज ठाकरे यांच्यासोबत शिवसेना उबाठा गटाचे खासदार संजय राऊत, राष्ट्रवादी शरद पवार पक्षाचे प्रदेशाध्यक्ष शशिकांत शिंदे यांच्यासोबत महाविकास आघाडीतील प्रमुख नेते मेळाव्यात उपस्थित राहून कार्यकर्त्यांना मार्गदर्शन करणार आहे. दरम्यान, मेळाव्याच्या ठिकाणी बांधण्यात आलेल्या सभामंडपात मोठे व्यासपीठ उभारण्यात आले आहे. मैदानात पाच मोठे एलईडी स्क्रीन लावण्यात आले आहेत. मेळाव्यासाठी राज्यभरातून येणाऱ्या कार्यकर्त्यांच्या वाहनांसाठी तीन ते चार ठिकाणी वाहनतळ तयार करण्यात आले आहेत. पिण्याच्या पाण्याचे टँकर्स, पाण्याच्या बाटल्यांची व्यवस्थादेखील करण्यात आली आहे. कार्यकर्त्यांची गैरसोय होऊ नये यासाठी नियोजन करण्यात आले आहे. 20 ठिकाणी मोबाईल टॉयलेटची व्यवस्था करण्यात आली आहे. मेळाव्याला 25 हजारांहून अधिक कार्यकर्ते उपस्थित राहण्याची शक्यता आहे. त्यामुळे कार्यकर्त्यांना बसण्यासाठी हजारो खुर्च्या उपलब्ध करून देण्यात आल्या आहेत.

शेतकरी कामगार पक्षाचा मेळावा कार्यकर्त्यांसाठी एक पर्वणी आहे. त्यामुळे गेल्या अनेक दिवसांपासून पनवेलमध्ये सभामंडपाचे काम सुरु होते. हजारो कार्यकर्ते बसतील असा भव्यदिव्य मंडप उभारण्यात आला आहे. शेकापचे नेते माजी आमदार बाळाराम पाटील यांच्या देखरेखेखाली या मंडपाचे काम करण्यात आले आहे. सध्या पावसाळी हंगाम सुरू आहे. मेळाव्यासाठी येणाऱ्या कार्यकर्त्यांची पावसामुळे गैरसोय होऊ नये, म्हणून सुरक्षेच्या दृष्टीने सभामंडप बांधण्यात आले असल्याची माहिती देण्यात आली आहे. राज्यातील वेगवेगळ्या भागातून शुक्रवारपासूनच कार्यकर्ते पनवेलमध्ये दाखल झाले आहेत.

महाविकास आघाडीचे कार्यकर्तेदेखील राहणार उपस्थित
शेतकरी कामगार पक्षाच्या वर्धापन दिनानिमित्त कार्यकर्त्यांचा भव्य मेळावा आयोजित केला आहे. या मेळाव्यामध्ये शेतकरी कामगार पक्षाचे हजारो कार्यकर्ते सहभागी होणार आहे. त्यांच्यासोबत महाविकास आघाडीचे कार्यकर्तेदेखील उपस्थितीत राहणार आहेत. मनसेचे अध्यक्ष राज ठाकरे यांची या मेळाव्याला प्रमुख उपस्थिती राहणार आहे. त्यामुळे त्यांचे विचार ऐकरण्यासाठी मनसेचे असंख्य कार्यकर्तेदेखील उपस्थित राहणार असल्याची माहिती मनसेचे नेते योगेश चिले यांनी दिली. तसेच महाविकास आघाडीतील काँग्रेसचे आ. विजय वडेट्टीवार, राष्ट्रवादी शरदचंद्र पवार पक्षाचे प्रदेशाध्यक्ष शशिकांत शिंदे व शिवसेना उद्धव ठाकरे पक्षाचे नेते खा. संजय राऊत यांची प्रमुख उपस्थिती असणार आहे. त्यामुळे महाविकास आघाडीचे असंख्य कार्यकर्तेदेखील दिग्गज नेत्यांचे विचार ऐकण्यासाठी या मेळाव्यात सहभागी होणार आहेत.