ग्रामपंचायत निवडणुकांसाठी शेकापची रणशिंगे

| चणेरा | प्रतिनिधी |

रोहा तालुका शेतकरी कामगार पक्षाची महत्त्वपूर्ण सभा रोह्यात पार पडली. यावेळी आगामी ग्रामपंचायत निवडणुका, पक्ष संघटन मजबूत करणे, तसेच स्मार्ट मीटरविरोधातील आंदोलन या प्रमुख विषयांवर सखोल चर्चा करण्यात आली.

या सभेच्या प्रारंभी तालुका चिटणीस शिवराम महाबले यांनी पक्षाची भूमिका, विचारधारा आणि संघटनात्मक धोरण याविषयी कार्यकर्त्यांना सविस्तर मार्गदर्शन केले. त्यांनी दि.2 ऑक्टोबर रोजी साजरा होणाऱ्या शेतकरी कामगार पक्षाच्या वर्धापन दिनाचे महत्त्व विशद करत विविध कार्यक्रमांची माहिती दिली. तसेच, राज्यभर सुरू असलेल्या स्मार्ट मीटर योजनेविरोधात पक्षाच्या भूमिकेची माहिती देत दि.6 जुलै रोजी रोहा तहसीलदारांना निवेदन देण्यात येणार असून, सर्व कार्यकर्त्यांनी मोठ्या संख्येने उपस्थित राहावे, असे आवाहन केले आहे. यावेळी आरडीसीसी बँकेचे संचालक गणेश मढवी यांनी मार्गदर्शन करत आगामी ग्रामपंचायत निवडणुकांमध्ये शेतकरी कामगार पक्षाचे उमेदवार उभे करून पक्षाची ताकद दाखविण्याची गरज व्यक्त केली. प्रत्येक शाखेने निवडणुकांच्या तयारीला आतापासून सुरुवात करून संघटन अधिक सक्षम करण्यासाठी कार्यकर्त्यांनी सज्ज राहावे, असे त्यांनी सांगितले.

या सभेला ज्येष्ठ कार्यकर्ते शंकरराव म्हसकर, आरडीसीसी बँकेचे चेअरमन गणेश मढवी, जिल्हा चिटणीस सदस्य विठ्ठल मोरे, रोहा तालुका चिटणीस शिवराम महाबळे, मजूर फेडरेशनचे हेमंत ठाकूर, कार्यालयीन चिटणीस संदेश विचारे, पुरोगामी युवक संघटना रोहा अध्यक्ष संतोष दिवकर, उपाध्यक्ष अमोल शिंगरे, ज्येष्ठ कार्यकर्ते खांडेकर सर, तुकाराम खांडेकर, गणपत डाकी, जांभेकर, धनंजय पोकळे, सरफळे यांच्यासह शेतकरी कामगार पक्षाचे पदाधिकारी व कार्यकर्ते मोठ्या संख्येने उपस्थित होते.