अनोख्या पद्धतीने शिवजयंती होणार साजरी

शैलेंद्र एज्युकेशन सोसायटी दहिसर येथे शिवदुर्ग सोहळ्याचे आयोजन

। मुंबई । प्रतिनिधी ।

शैलेंद्र एज्युकेशन सोसायटी दहिसरच्या सुवर्ण महोत्सवी वर्षानिमित्त संस्थेच्या महाविद्यालय आणि शाळा शिवदुर्ग या दिमाखदार सोहळ्याचे आयोजन करण्यात आले आहे. छत्रपती शिवाजी महाराजाच्या 396 व्या जन्मोत्सवाचे औचित्य साधून युनेस्कोने 2025 च्या जागतिक वारसा यादीसाठी नामांकन दिलेले 12 अभेद्य दुर्ग. महाविद्यालयातील व शाळेच्या 350 विद्यार्थ्यांनी अहोरात्र मेहनत घेऊन या 12 किल्ल्यांच्या 10×10 फूट आकाराच्या भव्य आणि हुबेहूब प्रतिकृती साकारणार आहेत. ‘हिंदवी स्वराज्या’चे सैन्य-सामर्थ्य आणि स्थापत्यशास्त्र जगासमोर मांडणारा हा एक अनोखा ‘मराठा मिलिटरी लँडस्केप’चा अविष्कार असेल.

‘शिवदुर्ग’ या सोहळ्यात शिवकालीन शौर्याची आणि संस्कृतीची विविध वैशिष्ट्ये अनुभवायला मिळणार आहेत. या प्रदर्शनाचे मुख्य आकर्षण म्हणजे स्वराज्यातील अस्त्र-शस्त्रांचे ‘शस्त्रागार’ आणि दुर्मिळ ‘नाणी संग्रहालय’. येथे शिवरायांनी चलनासाठी वापरलेले अमूल्य ‘होण’ आणि शत्रूच्या उरात धडकी भरवणारा दांडपट्टा, फिरंग, वाघनखे व ढाली यांसारख्या ऐतिहासिक शस्त्रास्त्रांचा खजिना मांडण्यात येणार आहे. केवळ शस्त्रेच नव्हे, तर ‘रणरागिणींचे युद्धकौशल्य’ ही या सोहळ्याची शान असेल. शिवकालीन युद्धकलेचे पुनरुज्जीवन करत महाविद्यालयीन तरुणी यावेळी चित्तथारक तलवारबाजी आणि मर्दानी खेळांचे थेट प्रात्यक्षिक सादर करून उपस्थितांच्या डोळ्यांचे पारणे फेडणार आहेत.

इतिहासाची ही गौरवशाली गाथा आणि गड-कोटांचे वैभव अनुभवण्यासाठी हे प्रदर्शन दि.19 फेब्रुवारी रोजी दुपारी 2 ते रात्रौ 8 व 20 फेब्रुवारी रोजी सकाळी 11 ते दुपारी 4 वाजेपर्यंत सर्व नागरिक आणि शिवभक्तांसाठी विनामूल्य खुले राहणार असल्याचे शैलेंद्र महाविद्याल, प्राचार्या डॉ. स्वाती पितळे यांनी सांगितले.

इतिहासाच्या अभ्यासकांसाठी आणि जिज्ञासूंसाठी ‘प्रश्नमंजुषा’ आणि ‘कथाकथन’ यांसारख्या स्पर्धांतून इतिहासाची पाने पुन्हा उलटली जातील. तसेच, मराठा इतिहासातील देदीप्यमान व्यक्तिमत्त्वांचे दर्शन घडवणारी वेशभूषा स्पर्धा आणि पारंपारिक वाद्यांच्या गजरात निघणारी ‘भगवी मिरवणूक’ यांमुळे संपूर्ण दहिसर परिसर शिवमय होणार आहे.

– आदित्य धायफुले, सहाय्यक प्राध्यापक, शैलेंद्र महाविद्याल