शिवशक्तीची शिरोडकर स्पोर्ट्सवर मात

जय भारत विजय क्लबकडून पराभूत

। मुंबई । प्रतिनिधी ।

राष्ट्रीय मिल मजदूर संघ आयोजित कामगार महर्षी गं.द. आंबेकर स्मृती कबड्डी महोत्सवाचे आयोजन करण्यात आले होते. स्पर्धेतील महिला गटात अत्यंत चुरशीच्या झालेल्या अंतिम लढतीत शिवशक्तीने डॉ. शिरोडकर स्पोर्ट्स क्लबचा 35-30 असा पराभव करीत जेतेपद पटकावले आहे. पुरुषांच्या स्थानिक गटात विजय क्लबने जय भारत क्रीडा संघाचा पराभव करत बाजी मारली तर व्यावसायिक गटात स्वामी समर्थने रिझर्व बँक स्पोर्ट्स क्लबचा 34 -32 असा अवघ्या दोन गुणांनी पराभव करीत विजेतेपदावर शिक्कामोर्तब केले आहे.

द्वितीय श्रेणीत जय शंकर चौक यांनी, तर कुमारी गटात शिवकन्या मंडळोन उपांत्यपूर्व फेरीत धडक दिली आहे. महिलांच्या गटात शिवशक्ती महिला संघाला जेतेपद पटकावताना डॉक्टर शिरोडकर स्पोर्ट्स क्लबशी कडवी झुंज द्यावी लागली. मध्यंतराला शिवशक्तीकडे 20-16 अशी चार गुणांची आघाडी होती. दुसर्‍या सत्रात शिरोडकरच्या चढाई पटूंनी जोरदार संघर्ष करत शिवशक्तीशी बरोबरी साधण्याचा वारंवार प्रयत्न केला होता. मात्र, ते थोडक्यात अपयशी पडले आणि शिवशक्तीने 35-30 असा विजय मिळवत आपल्या जेतेपदांची मालिका कायम राखली आहे.

व्यावसायिक गटात स्वामी समर्थ आणि रिझर्व बँक स्पोर्ट्स क्लब यांच्यातला अंतिम सामनाही अत्यंत चुरशीचा झाला. या लढतीत रिझर्व बँक स्पोर्ट्स क्लबच्या खेळाडूंनी आक्रमक खेळ करत मध्यंतराला 13-11 अशी दोन गुणांची आघाडी आपल्याकडे राखली होती. मात्र, दुसर्‍या सत्रात स्वामी समर्थच्या चढाई बहाद्दरांनी वेगवान खेळ करत आधी बरोबरी साधली आणि नंतर आघाडी घेत ती शेवटपर्यंत कायम राखत जेतेपदही पटकावले आहेे. त्यांनी हा संघर्ष 34- 32 असा जिंकला.
तसेच, जिल्हा अजिंक्यपद निवड चाचणी कबड्डी स्पर्धेत चेंबूर क्रीडा केंद्र प्रथम श्रेणी गटाच्या चौथ्या, तर उत्कर्ष मंडळ तिसर्‍या फेरीत दाखल झाले आहेत. पुरुषांच्या स्थानिक गटात मात्र विजय क्लब आणि जय भारत क्रीडा संघात झालेला अंतिम सामना अत्यंत एकतर्फी झाला. विजय क्लबच्या खेळाडूंनी प्रारंभीच पल्लेदार चढाई करत 17-5 अशी आघाडी घेत सामन्यावर वर्चस्व मिळवले आहे. दुसर्‍या सत्रातही जय भारतच्या खेळाडूंचे काहीही चालू शकले नाही. परिणामतः विजय क्लबने ही लढाई 27-13 अशी सहज जिंकली आहे.