उल्हास नदीवरील श्रीराम पूल खुला होणार

| नेरळ | प्रतिनिधी |

कर्जत शहरातून वाहणाऱ्या उल्हास नदीवर असलेल्या जुन्या पुलाच्या बाजूला नवीन पूल बांधला जात आहे. या नवीन पुलाचे काम 2021 पासून सुरू असून, यावर्षी पावसाळ्याआधी हा पूल वाहतुकीस खुला होणार आहे. आठ कोटी खर्चून हा पूल बांधण्यात येत असून, जून महिन्यात हा पूल खुला होईल अशी माहिती सार्वजनिक बांधकाम विभागाकडून देण्यात आली आहे. दरम्यान, कर्जत शहरात श्रीराम पुलावर होणारी वाहतूक कोंडी नवीन पूल वाहतुकीस खुला झाल्यानंतर येथील वाहतूक कोंडी कमी होण्यास मदत होईल.

शहापूर- मुरबाड -कर्जत- खोपोली या राष्ट्रीय महामार्ग 548 ‘अ’ वरील कर्जत येथील उल्हास नदीवर असलेल्या पुलाचे काम अंतिम टप्प्यात आहे. 2021 मध्ये या पुलाच्या कामाचे भूमिपूजन मुंबईच्या तत्कालीन महापौर पेडणेकर यांच्या हस्ते झाले होते. महाराष्ट्र राज्य रस्ते विकास महामंडळ यांच्या शहापूर- मुरबाड -कर्जत- खोपोली राष्ट्रीय महामार्ग वरील रस्त्यावर पूल बांधण्यासाठी सार्वजनिक बांधकाम विभाग यांच्या माध्यमातून या पुलाच्या कामासाठी आठ कोटींचा निधी मंजूर होता.

या पुलाच्या बांधकामाची गरज मागील दहा वर्षापासून असून, 2021 मध्ये बांधकाम सुरू झालेल्या या पुलाच्या पूर्णत्वाचा विषय कायम चर्चेत येत होता. त्याचे कारण या पुलाच्या बाजूला असलेला उल्हास नदीवरील श्रीराम पूल हा मागील काही वर्षे वाहतील कोंडीचा हॉटस्पॉट बनला होता. त्यामुळे नवीन पुलाची गरज पुढे आली होती आणि त्यामुळे हा पूल कधी पूर्ण होणार? याकडे दहिवली गावातील नागरिकांचे सर्वाधिक लक्ष असायचे. कारण विकेंडचे दिवशी कर्जत शहरात असलेल्या शाळांमध्ये दहिवली भागातील मुलांना शाळेत पोहचवणे हे वाहतूक कोंडीमुळे अडथळा बनले होते.

अखेर या पुलाचे काम अंतिम टप्प्यात असून, या महिन्यात नवीन पूल वाहतुकीस खुला होणार आहे. वाहतुक कोंडीवर मात करण्यासाठी नवीन पुलाची निर्मिती महत्वाची ठरली असून, कर्जत शहराकडील भाग रस्त्याला जोडला गेला आहे. तर मुरबाड कडील भाग याचे काम अंतिम टप्प्यात आहे. सार्वजनिक बांधकाम विभागाने या पुलाच्या कामाला अंतिम रूप देण्यासाठी मागील सहा सात महिन्यात जोरदार प्रयत्न केले आहेत. माजी आमदार सुरेश लाड यांनी राज्याचे मुख्यमंत्री देवेंद्र फडणवीस यांना या पुलाच्या रखडलेल्या कामाबद्दल पत्र देऊन पूर्णत्वाकडे नेण्याची मागणी केली होती. पुलाचे काम वेगाने आणि तांत्रिक दृष्ट्या चांगले व्हावे यासाठी बांधकाम विभागाचे उप अभियंता राहुल देवांग यांनी ठेकेदार कंपनीला यावर्षी पावसाळ्या आधी कामे पूर्ण करण्याकडे लक्ष घातले होते. त्यामुळे काही दिवसात हा पूल वाहतुकीस खुला होणार आहे.

वाहतूक कोंडी सुटणार
कर्जत शहरातील वाहतूक कोंडीचा हॉटस्पॉट असलेली श्रीराम पुलावरील कमी करण्यासाठी जुन्या श्रीराम पुलाच्या बाजूला असलेला नवीन पूल मदतगार ठरणार आहे.