खोपोली | प्रतिनिधी |
रविवारी रात्री एक वाजताच्या सुमारास रवी रोकडे आपल्या कुटुंबासह खोपोली शिळफाट्याच्या दिशेने जात असताना त्यांना खोपोली अमरधाम जवळ अपघात झालेला दिसला. त्यांनी तत्काळ गुरुनाथ साठेलकर यांना त्यासंबंधी कळवून मदत करण्यास सुरुवात केली, सामाजिक कार्यकर्ते मुकेश रूपवते आणि तेथे उपस्थित काही जणांनी त्याला बाहेर काढले. खोपोली नगरपालिकेच्या रुग्णालयात दाखल करत असताना तो जखमी युवक शेवटचे श्वास घेत होता. दुर्दैवाने उपचार सुरू करण्यापूर्वीच त्याची प्राणज्योत मालवली.
मृत सिद्धार्थ विनायक दळवी – 27 वर्षाचा अविवाहित आहे. युवक हा मूळ पेण येथे राहणारा असून, तो मोगलवाडीमध्ये कामानिमित्त आला होता. शीळफाट्यावरून खोपोलीकडे जात असताना हायको कॉर्नर जवळच्या वळणावर त्याचा बॅलन्स गेला असावा कारण त्या ठिकाणी ब्रेक लागल्याच्या खुणा आहेत. गाडीवरील नियंत्रण गेल्यामुळे तो स्वागत कमानीला धडकून गटारात कोसळला त्यामुळे त्याच्या डोक्याला मोठ्या प्रमाणात जखम झाली आणि रक्तस्रावही झाला. तेच त्याच्या मृत्यूचे कारण असावे असे निदान झाले.
अपघातात मुकेश रूपवते यांनी त्या जखमी युवकाला रक्तबंबाळ अवस्थेत स्वतःच्या गाडीमध्ये घेऊन हॉस्पिटलपर्यंत नेले. रवी रोकडे आणि त्यांच्या कुटुंबियांनी देखील यावेळी पुढाकार घेऊन मदत केली. काही युवक देखील यावेळी सहकार्यासाठी पुढे आले होते. मृत युवकाच्या डोक्याला मोठ्या प्रमाणात मार आहे त्याने हेल्मेट घातली असती तर त्याचे प्राण वाचू शकले असते.
खोपोली पोलीस ठाण्याचे कर्मचारी विकास पाटील, अमोल धायगुडे, रुपनर यांनी गुरुनाथ साठेलकर तरुणांसाठी यांच्यासमवेत त्या मुलाची ओळख शोधण्यासाठी अनेक तांत्रिक बाबी हाताळल्या नितेश शहा यांचे देखील सहकार्य झाले. पहाटेच्या दरम्यान त्याच्या कुटुंबातील सर्वजण खोपोलीत दाखल झाले त्यांनी मृत युवकाची शहानिशा केली आणि तो सिध्दार्थ असल्याचे सांगीतले.