सदोष मतदार याद्यासाठी विशेष मोहीम

| पनवेल । वार्ताहर ।

मतदार याद्या सदोष करण्यासाठी निवडणूक आयोगाच्या सूचनेनुसार विशेष मोहीम हाती घेण्यात आली आहे. यानुसार मतदारांची ओळखपत्रे आधार कार्ड लिंक करण्याचे काम हाती घेण्यात आले आहे, पण खारघर आणि करंजाडेतील मतदारांची नावे पनवेलमधील वावंजे गावातील मतदार यादीत समाविष्ट झाल्याने प्रशासनाची आता धावपळ उडाली आहे.

आगामी लोकसभा आणि विधानसभा निवडणुकीपूर्वी मतदार याद्या अधिकाधिक निर्दोष करण्यासाठी मतदार ओळखपत्र आधार कार्डशी लिंक करण्याची मोहीम निवडणूक विभागाने एक ऑगस्टपासून सुरू केली आहे. पनवेल मतदार विधानसभा संघात बीएलओच्या मदतीने मतदाराच्या गृहभेटी करून आधार कार्ड सलंग्न करण्याचे काम केले जात आहे. मात्र, अनेक वर्षांपासून खारघर, करंजाडे व इतर काही भागात मतदान करणार्‍या मतदारांची नावे अचानक पनवेल ग्रामीणमधील वावंजे गावातील मतदार यादीत समाविष्ट करण्यात आल्याने मतदारांसह बीएलओ कर्मचार्‍यांना मनस्ताप सहन करावा लागत आहे. सध्या अशा मतदारांशी दूरध्वनीवरून संपर्क साधण्यात येत असून पनवेल तहसील कार्यालयातील निवडणूक विभागात भेट देऊन दुरुस्ती करावी लागेल, अशी सूचना केली जात असल्याचे वावंजे गावात बीएलओचे काम करणार्‍या कर्मचार्‍यांनी सांगितले.

शंभराहून अधिक नावांचा घोळ
खारघर, करंजाडे आणि इतरही काही भागांतील जवळपास शंभराहून अधिक मतदारांची नावे वावंजे येथील मतदार यादीत समाविष्ट झाली आहेत. अशा मतदारांशी संपर्क साधून दुरुस्ती करून घ्यावी, असा निरोप दिला जात आहे. पण मतदार यादीतील नावात दुरुस्ती केली नाहीतर अशांना मतदानापासून वंचित रहावे लागणार आहे.

ज्या मतदारांची नावे स्थलांतर झाली आहे. अशा मतदारांनी स्थानिक बीएलओ अथवा तलाठ्याकडे आठ ‘ब’ नमुना अर्ज भरून द्यावा.

विजय तळेकर
तहसीलदार, पनवेल