एसटी बसची दुचाकीला धडक; दोन जण जखमी

। माणगाव । वार्ताहर ।

मुंबई-गोवा महामार्गावर दुचाकीला एसटी बसने मागून धडक दिली. या अपघातात दोन जण जखमी झाले. तसेच, दोन्ही वाहनांचे नुकसान झाले आहे. हा अपघात माणगाव येथील हॉटेल कार्तिकजवळ गुरुवारी (दि. 12) सायंकाळी 4.30 वाजण्याच्या सुमारास घडला.

घटनेतील बसचालक देविदास पुंडलिक चव्हाण (34) हे त्यांच्या ताब्यातील नालासोपारा ते खेड हि एसटी बस मुंबई-गोवा राष्ट्रीय महामार्गाने भरधाव वेगाने घेऊन जात असताना पाठीमागून बुलेट मोटार सायकलला धडक दिली. या अपघातात दुचाकीवरील शंकर नामदेव भद्रिके(70) व अंकुश शंकर भद्रिके (30) हे दोघे जखमी होऊन दोन्ही वाहनांचे नुकसान झाले. या अपघाताची नोंद माणगाव पोलीस ठाण्यात करण्यात आली असून एसटी बसचालकावर गुन्हा दाखल करण्यात आला आहे. घटनेचा अधिक तपास पोलीस निरीक्षक निवृत्ती बोऱ्हाडे यांच्या मार्गदर्शनाखाली पोलीस हवालदार सानप हे करीत आहेत.