पंडित पाटील यांच्या हस्ते उद्घाटन
| पोलादपूर | वार्ताहर |
पोलादपूर तालुक्यातील मोरगिरी ग्रामपंचायत हद्दीतील विविध विकासकामे शेतकरी कामगार पक्षाच्या माध्यमातून करण्याचा शब्द देण्यात आला होता. त्यांचा शुभारंभ आणि उद्घाटन माजी आ. पंडित पाटील यांच्या हस्ते करुन वचनपूर्ती केली आहे.
मोरगिरी ग्रामस्थांची वार्षिक महापूजा आणि हळदीकुंकू समारंभानिमित्त विविध कामांचे उद्घाटनांचे आयोजन माजी आ. पंडित पाटील यांच्या हस्ते करण्यात आले. याप्रसंगी शेकापक्षाच्या राजिप सदस्या सुमन कुंभार, सभापती नंदा चांदे, तालुका चिटणीस एकनाथ गायकवाड, बोरावळे सरपंच वैभव चांदे, पुरोगामी युवक संघटनेचे चंद्रकांत सणस, मोरगिरी सरपंच शरद जाधव, माजी सरपंच जगन्नाथ वाडकर, खरेदी विक्री संघाचे संचालक अजित कंक, मनोहर पार्टे, निवृत्ती उतेकर तसेच काशिनाथ कुंभार आदी मान्यवर उपस्थित होते. याप्रसंगी पोलादपूर नगरपंचायतीच्या नवनिर्वाचित नगरसेविका आशा गायकवाड-हांडे यांचा माजी आ. पंडितशेठ पाटील यांच्या हस्ते सत्कार करण्यात आला.
यावेळी पंडित पाटील म्हणाले की, शेकापक्षाचे रायगड जिल्हा परिषदेचे सर्वाधिक काळ अध्यक्ष राहिलेले स्व. प्रभाकर पाटील यांनी कुलाबा जिल्ह्याचे रायगड जिल्हा नामांतर बॅ. अंतुले मुख्यमंत्री असताना घडवून आणले, रायगडावर चौघडा वाजविण्याची प्रथा सुरू केली. रायगडावर जिल्हा परिषदेतर्फे निवासव्यवस्था सुरू केली तसेच रोपवे होण्यापूर्वी रायगडावर पंतप्रधान इंदिरा गांधी आणि राष्ट्रपती ग्यानी झैलसिंग यांना निमंत्रित केले, नरवीर तानाजी मालुसरे यांच्या उमरठला विकास केला. या सर्व शिवछत्रपतींच्या ऐतिहासिक वारशासाठी केलेल्या कामांची माहिती जनतेपर्यंत पोहोचविण्यात शेकापक्षाचा कार्यकर्ता कमी पडला, अशी खंतही पंडित पाटील यांनी व्यक्त केली.
प्रारंभी प्रास्ताविकामध्ये सरपंच शरद जाधव यांनी, पंचवीस वर्षांत शेकापक्षासोबत राहिल्यानंतर आपल्या सरपंचपदाच्या कारकीर्दीची दीड वर्षे शिल्लक असताना शेकापक्षाने नळपाणीयोजनेचे काम केले तर पदाचे सार्थक होईल, अशी अपेक्षा व्यक्त केली.
तालुका चिटणीस एकनाथ गायकवाड यांनी, आगामी काळात पोलादपूर तालुक्यातील जिल्हा परिषदेच्या दोन्ही जागा लढता येईल, अशी विकासकामे करून कोणत्या जागेवर निवडणूक लढायची याची वाट पाहात असल्याने कार्यकर्त्यांनी मागीलप्रमाणे निवडणुकीसाठी सज्ज राहण्याची मानसिकता बाळगावी, असे आवाहन केले. कार्यक्रमाचे सूत्रसंचालन प्रमोद शिंदे यांनी केले.