। पनवेल । वार्ताहर ।
अंमली पदार्थ विरोधी पथकाने नवीन पनवेल भागातील एका पान शॉपवर तसेच एका घरावर छापा मारुन सुमारे 2 लाख 33 हजार रुपये किंमतीचा परदेशी सिगारेटचा साठा तसेच गुटख्याचा साठा जप्त केला आहे. तसेच या कारवाईत तिघांना ताब्यात घेतले आहे. नवीन पनवेल सेक्टर-11 मधील आदई सर्कल येथील विनम्र पान शाँपमध्ये वेगवेगळ्या ब्रँडचे विदेशी कंपनीचे सिगारेटचा तसेच गुटख्याचा साठा करुन त्यांची सर्रास विक्री करण्यात येत असल्याची माहिती अंमली पदार्थ विरोधी कक्षाला मिळाली होती. त्यामुळे वरिष्ठ पोलीस निरीक्षक सय्यद यांनी सदर पान शॉपवर कारवाई करण्याचे सुचित केल्यानंतर पोलीस उपनिरीक्षक विजय शिंगे, सहाय्यक पोलीस उपनिरीक्षक चौधरी व त्यांच्या पथकाने आदई सर्कल येथील विनम्र पान शाँपवर छापा मारुन सदर पान शॉपची तपासणी केली. या कारवाईत सदर पान शॉपमध्ये वेगवेगळे विदेशी सिगारेटचे पाकिटे व आर एम डी गुटखा व सुगंधी तंबाखुचा साठा करुन ठेवण्यात आल्याचे आढळुन आले. त्यानंतर अंमली पदार्थ विरोधी पथकाने सदर पान शॉपमधून 23,880 किंमतीचा पानमसाला, सुगंधीत तंबाखु व विदेशी सिगारेटचा साठा जप्त केला. तसेच त्यांच्या घरातून 1 लाख 1 हजार 300 रुपये किंमतीचा पान मसाला व सुगंधित तंबाखूचा साठा तसेच 1 लाख 8 हजार रुपये किंमतीचा विदेशी सिगारेटचा साठा जप्त करण्यात आला. अंमली पदार्थ विरोधी पथकाने सुनिलकुमार विश्वकर्मा, प्रद्युमन सविता व आदित्य सविता या तिघा विरोधात खांदेश्वर पोलीस ठाण्यात गुन्हा दाखल करुन पुढील कारवाईसाठी तिघांना ताब्यात घेतले आहे.