पिसाळलेल्या कुत्र्यांचा नागरिकांवर हल्ला

ग्रामपंचायत प्रशासन अ‍ॅक्शन मोडवर; भटक्या कुत्र्यांचे होणार निर्बीजीकरण

। नागोठणे । वार्ताहर ।

नागोठणे शहरात दिवसागणिक भटक्या कुत्र्यांच्या संख्येत कमालीची वाढ झाली आहे. त्यातच काही दिवसांपासून शहरातील विविध भागात एका पिसाळलेल्या मोकाट कुत्र्याने लहान मुलांसह सुमारे वीस नागरिकांवर हल्ला करून चावा घेत त्यांना जखमी केल्याची घटना घडली आहे. या घटनेची नागोठणे ग्रामपंचायत प्रशासनाकडून तात्काळ दखल घेत शहरातील भटक्या कुत्र्यांचे निर्बीजीकरण करण्याची मोहीम सुरू करण्यात आली आहे. सरपंच सुप्रिया महाडिक यांच्याकडून सोमवार दि.28 एप्रिलपासून युद्ध पातळीवर निर्बीजीकरण मोहीम सुरु करण्यात येणार असल्याचे सांगण्यात आले आहे.

नागोठणे शहरातील भटक्या मोकाट कुत्र्यांची दहशत गेली अनेक महिन्यांपासून वाढली आहे. हे भटके कुत्रे टोळक्याने मुक्त संचार करीत सर्वत्र अक्षरशः हैदोस घालत आहेत. त्यातच दोन ते तीन दिवसांत पिसाळलेल्या मोकाट कुत्र्याने शहरातील विविध भागातील लहान मुलांसह सुमारे वीस नागरिकांचा चावा घेतला आहे. या घटनेनंतर सरपंच सुप्रिया महाडिक यांच्या मार्गदर्शनाखाली ग्रामपंचायत अधिकारी राकेश टेमघरे यांनी ग्रामपंचायत कर्मचार्‍यांच्या मदतीने शोध पथक तयार करत या कुत्र्याला पकडण्यासाठी शर्थीचे प्रयत्न केले; परंतु, पिसाळलेला मोकाट कुत्रा काही शोध पथकाच्या हाती लागला नाही.

दरम्यान, मोकाट कुत्र्यांच्या वाढत्या उपद्रवामुळे दहशतीचे वातावरण निर्माण झाले आहे. अनेकजण जखमी झाले आहेत. नागरिकांमध्ये भीतीचे वातावरण पसरु लागले आहे. त्यामुळे ग्रामपंचायत प्रशासन अ‍ॅक्शन मोडवर आले आहे. त्यावर ठोस उपाय म्हणून सरपंच सुप्रिया महाडिक यांनी सोमवार दि. 28 एप्रिलपासून शहरात भटक्या मोकाट कुत्र्यांची निर्बीजीकरण मोहीम हाती घेण्याचा निर्णय घेतला आहे. ही मोहीम नागोठणे ग्रामपंचायत प्रशासन, प्राणी संघटना रोहा व पशुधन अधिकारी पंचायत समिती रोहा यांच्यामार्फत संयुक्तिक रित्या राबविण्यात येणार आहे. तर, शहरातील भटक्या कुत्र्यांचे शंभर टक्के निर्बीजीकरण (नसबंदी) करण्यासंबंधित प्रशासनाला यश मिळाल्यास भविष्यात मोकाट कुत्र्यांच्या संख्येत कमालीची घट होईल. आणि शहरातील नागरिकांची देखील मोकाट कुत्र्यांच्या दहशतीपासून सुटका होऊ शकते. त्यामुळे शहरातील विविध भागातील नागरिकांनी देखील मोकाट कुत्र्यांच्या निर्बीजीकरणासाठी ग्रामपंचायत प्रशासनास सहकार्य करावे, असे आवाहन सरपंच सुप्रिया महाडिक यांनी केले आहे.

नागोठणे गावात पिसाळलेल्या कुत्र्याने धुमाकूळ घालून अनेक ग्रामस्थांना जखमी केले आहे. याची विशेष दखल घेऊन खबरदारी म्हणून नागोठणे गावातील भटक्या कुत्र्याचे निर्बीजीकरण लसीकरण मोहीम सुरु करण्यात येणार आहे. ही मोहीम संयुक्तिक रित्या राबविण्यात येणार आहे. तसेच, ग्रामपंचायतीकडून भटक्या कुत्र्यांचे निर्बीजीकरण करण्याचा प्रस्ताव वरिष्ठ कार्यालयाकडे मंजुरीकरिता पाठविण्यात आला आहे.

– सुप्रिया संजय महाडिक, सरपंच, नागोठणे