नेणवली शाळेत पर्यावरणपूरक रक्षाबंधन सण साजरा
। पाली/बेणसे । प्रतिनिधी ।
सुधागड तालुक्यातील नेणवलीच्या जिल्हा परिषद शाळेतील मुलांनी यावर्षीचा रक्षाबंधन सण अत्यंत अनोख्या आणि पर्यावरणपूरक पद्धतीने साजरा केला. नेहमीप्रमाणे हाताने तयार केलेल्या राख्या एकमेकांना बांधण्याऐवजी, मुलांनी स्वतः बनवलेल्या पर्यावरणपूरक राख्या वृक्षांना बांधून पर्यावरणाचे रक्षण करण्याचा संदेश दिला.
या उपक्रमात शाळेतील सर्व मुलांनी उत्साहाने सहभाग घेतला. मुलांनी टाकाऊ वस्तूंपासून आणि नैसर्गिक साहित्यापासून सुंदर राख्या तयार केल्या. या राख्यांमध्ये प्लास्टिकचा वापर टाळण्यात आला होता. त्यानंतर, विद्यार्थ्यांनी आपल्या शाळेच्या परिसरात लावलेल्या झाडांना या राख्या बांधून ‘वृक्ष जोपासण्याचा वसा’ घेतला.
यावेळी मुलांनी ‘वृक्ष हाच खरा भाऊ, पर्यावरणाचे रक्षण हाच खरा सण’ असा संदेश दिला. तसेच, झाडांप्रती कृतज्ञता व्यक्त करून त्यांचे संरक्षण करण्याची शपथही मुलांनी घेतली. या अनोख्या उपक्रमामुळे मुलांमध्ये पर्यावरणाविषयी जागरूकता निर्माण झाली असून, इतरांनाही त्यातून प्रेरणा मिळेल, अशी आशा व्यक्त करण्यात येत आहे. या उपक्रमासाठी विषय शिक्षक रवींद्र हंबीर यांनी मुलांना सहकार्य केले.
शाळेचे मुख्याध्यापक राजेंद्र अंबिके यांनी विद्यार्थ्यांच्या या उपक्रमाचे कौतुक केले आणि सांगितले की, अशा उपक्रमांमुळे मुलांना लहानपणापासूनच पर्यावरणाचे महत्त्व समजेल आणि ते जबाबदार नागरिक बनतील.