सुधागडात अवकाळी पावसाचा तडाखा

पाली-खोपोली महामार्गावर होर्डिंग कोसळले, प्रशासनाविरोधात संताप

। सुधागड-पाली । प्रतिनिधी ।

सुधागड तालुक्यात अवकाळी पावसामुळे जनजीवन विस्कळीत झाले असून, पाली-खोपोली राज्य महामार्गावरील तिवरे, खुरावले फाट्याजवळ एक मोठे होर्डिंग कोसळले. सुदैवाने त्या ठिकाणी कोणतेही नागरिक उपस्थित नसल्याने जीवितहानी टळली. मात्र, या घटनेमुळे प्रशासनाच्या निष्क्रियतेवर प्रश्नचिन्ह उपस्थित झाले आहे.

स्थानिक नागरिकांनी या होर्डिंगबाबत अनेक वेळा तक्रारी केल्या होत्या. रस्त्यालगत उभारलेले हे होर्डिंग पडल्याने वाहतुकीस अडथळा निर्माण झाला होता. या बाबत वारंवार निदर्शनास आणून दिले होते. तरीही संबंधित प्रशासनाने कोणतीही कारवाई केली नाही. परिणामी अवकाळी पावसाच्या जोरदार वाऱ्यामुळे हे होर्डिंग कोसळले आणि मोठा अपघात टळला. नागरिकांनी प्रशासनाविरोधात तीव्र संताप व्यक्त केला असून, “वारंवार तक्रारी करूनही दुर्लक्ष का केले?” असा जाब विचारला आहे. या घटनेमुळे भविष्यात अशा होर्डिंगमुळे मोठा अपघात होऊ शकतो, अशी भीती व्यक्त होत आहे.

अवकाळी पावसामुळे सुधागड तालुक्यातील अनेक भागांत झाडे उन्मळून पडली, वीजपुरवठा खंडित झाला आणि वाहतुकीत अडथळे निर्माण झाले. प्रशासनाने तातडीने कारवाई करून रस्त्यालगत असलेली धोकादायक होर्डिंग्स हटवावीत, अशी मागणी नागरिकांकडून जोर धरत आहे. या घटनेने पुन्हा एकदा प्रशासनाच्या निष्क्रियतेचा आणि दुर्लक्षाचा मुद्दा समोर आला असून, नागरिकांच्या सुरक्षेच्या दृष्टीने ठोस उपाययोजना करण्याची गरज अधोरेखित झाली आहे.