रोहा पोलीस निरीक्षकांसह संबंधितांवर तात्काळ कारवाई करा

आदिवासी संघटना आक्रमक
पोलीस अधीक्षकांना दिले निवेदन
| गोवे-कोलाड | वार्ताहर |
रायगड जिल्ह्यातील रोहा तालुक्यातील शेनवई आदिवासीवाडीतील पत्नीच्या खूनप्रकरणी रोहा पोलीस ठाण्यात अटक असणारा रवींद्र वसंत वाघमारे या कैद्याने चादरीच्या सहाय्याने लॉकअपमध्ये गळफास लावून आत्महत्या केली. या घटनेने एकच खळबळ माजली असून, याप्रकरणी आदिवासी संघटना आक्रमक झाल्या आहेत. याप्रकरणी रोहा पोलीस ठाण्याचे पोलीस निरीक्षक संजय पाटीलसह संबंधित कर्मचारी यांना तात्काळ निलंबित करण्यात यावे, असे निवेदनपत्र जिल्हा पोलीस अधीक्षक अशोक दुधे यांना विविध आदिवासी संघटना यांनी दिले आहे.

यावेळी जिल्हा पोलिस अधीक्षकांना निवेदन देण्यात आलेल्या शिष्टमंडळात महाराष्ट्र राज्य आदिम कातकरी संघटनेचे दत्तू वाघ, रायगड जिल्हा एकलव्य आदिवासी संघटनेचे भिवा पवार, राम कोळी, माणगाव आदिवासी हितरक्षक संघटनेचे उमेश जाधव, बबन कोळी, निजामपूर एकलव्य संघटनेचे नथुराम वाघमारे, रायगड आदिम कातकरी संघटनेचे लहू वाघमारे, पांडुरंग वाघमारे, शशिकांत कोळी, महिला अध्यक्षा गुलाब ताई वाघमारे बेबीताई कापरे, एकनाथ वाघे, विठोबा जाधव, रोहाच्या सभापती गुलाबताई वाघमारे चंद्रकांत पवार विकास कोळी राम सावर, सर्वहारा जन आंदोलनाचे सोपान सुतार,अंकुश वाघमारे आदी कार्यकर्त्यांनी पोलीस अधीक्षक अशोक दुधे यांची भेट घेऊन आदिवासी तरुणाच्या मृत्यूस कारणीभूत ठरलेल्या रोहा पोलीस निरीक्षक संजय पाटील यांच्यासह संबंधित पोलीस कर्मचार्‍यांवर तात्काळ कारवाई करण्याची मागणी केली असून, त्वरित कारवाई न केल्यास आंदोलनाचा इशारा देण्यात आला आहे.