टॅक्सी चालकांनी भरले खड्डे

रस्ता सुस्थितीत करण्याचा टॅक्सी संघटनेकडून प्रयत्न

| नेरळ | प्रतिनिधी |

माथेरान या पर्यटनस्थळी जाण्यासाठी एकमेव घाटरस्ता म्हणून नेरळ-माथेरान हा रस्ता आहे. माथेरान डोंगरात मोठ्या प्रमाणात पाऊस पडतो आणि त्यामुळे या घाटरस्त्यातील डांबरी रस्ता खराब होतो. त्यावेळी माथेरानला जाणाऱ्या पर्यटक प्रवासी यांची ने-आण करणाऱ्या टॅक्सी चालकांना रस्त्यातील खड्डे भरावे लागतात. दरम्यान, तब्बल तीन ते चार फुटाचा एकसंघ दगड भरून खड्डा भरण्याची कसरत केली आहे.

थंड हवेचे ठिकाण असलेल्या माथेरानमध्ये सर्वाधिक पर्यटक हे पावसाळ्यातील चार महिने येत असतात. माथेरान डोंगरात पावसाळ्यात 5000 मिली पाऊस होतो. शहरातील रस्ते आणि प्रामुख्याने घाटरस्ता जास्त पर्जन्यमानामुळे खराब होतो. डांबरीकरण केलेला रस्ता दरवर्षी पावसामुळे खराब होत असल्याने नेरळ-माथेरान टॅक्सी संघटनेचे टॅक्सी चालकांना रस्त्यावरील खड्डे अनेकदा भरावे लागतात. यावेळी घाटरस्त्यातील चांगभले मंदिर भागातील रस्ता सर्वाधिक खराब झाला आहे. त्या भागात पावसाचे पाणी रस्त्यातून वाहत जात असल्याने रस्त्यावची दुरवस्था झाली आहे. दरम्यान, रस्त्याची खोली किमान दोन फूट झाल्यान वाहनचालकांसाठी हा रस्ता धोकादायक बनला होता. तसेच या ठिकाणी वळणावर तीव्र उतार असून, त्याच ठिकाणी 3 फुटाचा खड्डा पडला आहे. त्यामुळे तो खड्डा भरण्यासाठी चक्क मालवाहू टेम्पोची मदत घ्यावी लागली. तो खड्डा बुजविण्यासाठी या मालवाहू टेम्पोमधून मोठमोठे दगड आणण्यात आले आणि त्याद्वारे येथील खड्डा बुजविण्यात आला. तब्बल तासभर टॅक्सी चालक हे दगड उचलून खड्डे भरण्याची कामे करीत होते. टॅक्सी चालकांच्या सेवाभावी वृत्तीमुळे नेरळ-माथेरान घाटातून खासगी वाहनांचा देखील प्रवास सुखकर झाला आहे.

प्रशासनाने लक्ष घालण्याची गरज
माथेरानमध्ये दि.15 ऑगस्ट रोजी किमान 50 हजार पर्यटक आले होते. तसेच, नगरपरिषदेच्या प्रवासी स्वच्छता कर येथे 45 हजार पर्यटकांची नोंद झाली आहे. त्या एका दिवसात या सर्व पर्यटकांना नेरळ-माथेरानच्या टॅक्सी संघटनेच्या चालकांनी सेवा दिली आहे. परंतु, येथील घाटरस्त्यावरील खड्ड्यांमुळे चालकांसह पर्यटकांना नाहक त्रास सहन करावा लागला. त्यामुळे संबंधित प्रशासनाने लक्ष घालून नेरळ-माथेरान घाटरस्त्याच्या दुरूस्तीसाठी दरवर्षी प्रयत्न करावेत. त्यामुळे माथेरान हे पर्यटनस्थळ आणखी फुलून येईल आणि सर्वांना व्यवसाय मिळेल, असे नेरळ-माथेरान टॅक्सी संघटनेच्या टॅक्सी चालकांमधून बोलले जात आहे.