पुण्यामध्ये भीषण अपघात; नऊ जणांचा जागीच मृत्यू

| पुणे | प्रतिनिधी |

पुण्यातील नारायणगाव परिसरात झालेल्या भीषण अपघातात नऊ जणांचा मृत्यू झाला आहे. एका भरधाव आयशर ट्रकने मॅक्स ऑटोला पाठीमागून धडक दिल्याने हा ऑटो चेंडू प्रमाणे हवेत उडाला. यातील 9 प्रवाशांचा जागीच मृत्यू झाला तर तीन जण जखमी झाले आहेत. या घटनेत मृतांचा आकडा वाढण्याची शक्यता आहे.

पोलिसांनी दिलेल्या माहितीनुसार, हा अपघात पुणे-नाशिक महामार्गावर नारायणगाव येथे सकाळी 10 वाजता झाला. या घटनेमध्ये नऊ जणांचा मृत्यू झाला तर तिघे जण जखमी झाले आहेत. एक प्रवासी वाहतूक करणाऱ्या मॅक्स ऑटो हा पुणे नाशिक मार्गाने जात होता. यावेळी पाठीमागून भरधाव वेगात येणाऱ्या आयशर टेम्पोने या ऑटोला जोराची धडक दिली. त्यामुळे हा ऑटो एखाद्या चेंडू प्रमाणे हवेत उडाला. हा ऑटो या मार्गावर ब्रेक फेल झालेल्या एसटीवर जाऊन आदळला. या घटनेत 4 महिला, 4 पुरुष व एका बाळाचा जागीच मृत्यू झाला आहे. तर इतर तिघे जखमी झाले आहेत. मृत्युमुखी पडलेल्यांची व जखमींची नावे समजू शकली नाहीत. या परिसरात ट्राफिक जाम झाले होते. स्थानिक नागरिक व पोलिसांनी तात्काळ घटनास्थळी दाखल होत, अपघातातील जखमींना उपचारांसाठी रुग्णालयात दाखल केले. जखमी झालेल्यांपैकी काहींची प्रकृती गंभीर आहे. यामुळे मृतांच्या संख्येत वाढ होण्याची शक्यता वर्तवली जात आहे. या घटनेचा अधिक तपास पोलीस करीत आहेत.