अलिबाग शहरातील घटनेने खळबळ
हत्या केल्याचा संशय
। अलिबाग । विशेष प्रतिनिधी ।
शहरातील जुन्या नगरपालिकेसमोर असलेल्या एका इमारतीच्या पंप हाऊसमध्ये रक्ताच्या थारोळयात अज्ञात इसमाचा मृतदेह सापडल्याने खळबळ उडाली आहे. सदर इसमाचा नैसर्गिक मृत्यू झाला की हत्या अशा चर्चांना उधाण आले असून विविध तर्क वितर्क व्यक्त केले जात आहेत.
शहरातील निशा अपार्टमेंट इमारतीच्या पंप हाऊस मध्ये रविवारी सकाळी पंप हाऊस उघडण्यास गेलेल्या इसमाला रक्ताच्या थारोळयात मृतदेह आढळून आला. अलिबाग नगरपरिषदेचे नगराध्यक्ष प्रशांत नाईक, नगरसेवक अनिल चोपडा तसेच धर्मेश शाह आदींना सदर प्रकार कळताच त्यांनी याप्रकरणी अलिबाग पोलिस ठाण्यात माहिती दिल्यानंतर पोलिसांनी येऊन माहिती घेण्यास सुरुवात केली. सदर मृतदेहाला दुगंधी सुटून तो सडू लागला असल्याने या पंपहाऊस मध्ये मागील दोन दिवसांपासून सदर मृतदेह टाकून ठेवण्यात आला असावा असा अंदाज व्यक्त करण्यात आला आहे. त्यामुळे या परीसरात दुर्गंध पसरला होता.
पोलिसांनी घटनास्थळी धाव घेतली. संबधीत परीसराचा पंचनामा केला. तसेच मृत व्यक्ती कोणाच्या ओळखीची आहे या याची चौकशी ही केली. मात्र मृत इसमाच्या ओळखीचा पुरावा मिळाला नाही. संध्याकाळी उशीरापर्यंत पोलिस ठाण्यात याप्रकरणाची नोंद करण्याचे काम सुरु होते.
दरम्यान या अपार्टमेंट मध्ये शुक्रवारी रात्री 9 च्या सुमारास एक अज्ञात इसम घाबरल्याच्या अवस्थेत घूसून आपल्यावर हल्ला करुन आपल्याला ठार मारतील अशी भीती व्यक्त करीत वाचविण्यासाठी याचना करीत होता. मात्र महिलाच असल्याने त्याला कोणीही वाचविण्यासाठी पुढे येऊ शकले नाही. शेवटी तिसर्या दिवशी अज्ञात इसमाचा मृतदेह आढळल्याने भीतीचे वातावरण पसरले आहे. यासंदर्भात पोलिस निरीक्षक शैलेश सणस यांच्याशी संपर्क साधला असता त्यांनी सदर इसमाची ओळख पटविण्याचे काम सुरु असून त्याचा चेहरा संपूर्णपणे विदु्रप झालेला असल्याने इमारतीत घुसलेला तोच इसम असल्याबाबत ठामपणे सांगता येणार नाही असे सांगितले.