सराईत सोनसाखळी चोरट्यास पाठलागाने पकडले

| अलिबाग | प्रतिनिधी |

खोपोली येथे रात्रीच्या वेळी शतपावली करणार्‍या महिलेच्या गळ्यातील सोनसाखळी खेचून पळून जाणार्‍या सराईत चोरट्यास खोपोली पोलीसांनी थरारक पाठलाग करून अटक केली आहे. सोनम निकेत देशमुख कारमेल स्कूल, भानवजच्या समोरील रस्त्यावर त्यांच्या नातेवाईकांसोबत शतपावली करीत असतांना एका अज्ञात आरोपीने मोटारसायकलवर येवून त्यांच्या गळयातील एक सोन्याचा मुलामा दिलेले मंगळसूत्र जबरदस्तीचे खेचून जबरी चोरी करून मोटार सायकलवर वेगाने निघून गेला. यामध्ये त्यांना व सोबतच्या साक्षीदार यांना ढकलून दिल्याने दुखापत झाली.

त्याच आरोपीने मोटार सायकलवर पुढे जात मौजे येथील एच.एम.सुपर मार्केटच्या समोर रस्त्यावर शतपावली करीत असणार्‍या गंगा यादव गौडा, यांच्या देखील गळयातील मंगळसूत्र जबरदस्तीने खेचून जबरी चोरी करण्याचा प्रयत्न करून पळून गेला. परंतू यादव गौडा यांनी त्यांच्या गळयातील मंगळसूत्र पकडून ठेवल्याने यामध्ये चोरास यश आले नाही. याबाबत दोन्ही महिलांच्या नातेवाईकांनी तातडीने खोपोली पोलीस ठाणे येथे फोन करून घटनेबाबत माहिती कळविली. त्यानंतर पोलीस निरीक्षक शिरीष पवार यांनी त्वरीत पोलीस ठाण्याकडील पोलीस अधिकारी व अंमलदार यांना रवाना करून शहरातील सर्व एक्झीट पॉईंटवर नाकाबंदी सुरू केली व नमूद पिडीत दोन्ही महिलांना घडलेल्या प्रकाराबाबत तक्रार दाखल करण्याकरिता पोलीस ठाण्यात येण्यास सुचविले.

याच दरम्यान खोपोली शहरातील लक्ष्मीनगर येथील शक्ती सोसायटीच्या समोरच्या एक संशईत मोटार सायकलस्वार चेह-याला मास्क घालून रात्रीच्या वेळी संशयास्पदरितीत फिरत असल्याची माहिती नागरीक श्री. गौरव उत्तम शिंदे यांनी पोलीसांना दिली. त्यामुळे त्वरीत भालेराव व इतर लक्ष्मीनगर येथील शक्ती सोसायटी समोर पोहोचले. संशयित मोटार सायकलस्वारास पोलिसांचा संशय आल्याने तो देखील तेथून त्याच्या मोटार सायकलवरून पळून जाण्याचा प्रयत्न केला परंतू पोलिसांनी थरारक पाठलाग करून संशयितास मोटार सायकलसह ताब्यात घेतले व पोलीस ठाण्यात घेऊन आले. त्यास पोलीस ठाण्यात आणल्यानंतर तक्रार देण्याकरिता हजर असणार्‍या दोन्ही तक्रारदार महिलांनी आरोपीस आणि त्याच्या कडील मोटार सायकल यांना ओळखून तोच इसम जबरी चोरी करून पळून गेल्याचे पोलीसांना सांगितले. त्यामुळे पोलीसांनी नमूद इसमाची दोन पंचांसमक्ष झडती घेतली सोनम निकेत देशमुख यांच्या गळयातून जबरी चोरी करून नेलेले मंगळसूत्र त्याच्याकडे मिळून आले. त्यामुळे पोलिसांनी सतिश नामदेव कोळंबेकर (सोमजाईवाडी,खोपोली) याच्याविरूध्द गुन्हे दाखल करून त्यास अटक केलेली आहे.

आरोपीत नामे सतिश नामदेव कोळंबेकर याचे पुर्व रेकॉर्ड तपासले असता त्याच्याविरूध्द कळंबोली व रसायनी पोलीस ठाणे येथे घरफोडीचे गुन्हे दाखल आहेत. सदरचा आरोपी सराईत असल्याचे निष्पन्न झाले आहे. गुन्हयात चोरीस गेलेली सर्व मालमत्ता आणि आरोपीने गुन्हा करण्याकरिता वापरलेली मोटार सायकल जप्त केली आहे. पोलीस निरीक्षक शिरीष पवार, हरेश काळसेकर, राकेश कदम व खोपोली पोलीस ठाण्याकडील इतर पोलीस अंमलदार यांनी सदरची थरारक कामगिरी पार पाडली आहे.