आठ गावांत जाळला महायुती सरकारचा जाहीरनामा

। छत्रपती संभाजीनगर । प्रतिनिधी ।

महायुतीने निवडणुकीच्या काळात दिलेल्या आश्‍वासनाकडे सपशेल दुर्लक्ष करण्यात आल्याने सरकारच्या जाहीरनाम्याची घनसावंगी तालुक्यातील आठ गावांत होळी करण्यात आली आहे.

शेतकर्‍यांना पहिल्याच कॅबिनेट बैठकीत कर्जमाफी, सोयाबीनची 6 हजार रुपयांनी खरेदी, सर्व शेती निविष्ठावरील जीएसटी कर रद्द करणार, एमएसपी अंतर्गत येणार्‍या सर्व शेतीमालाला 20 टक्के बोनस देऊन खरेदी करणार, लाडक्या बहिणीना 2100 रुपये महिना देणार, सुशिक्षित बेरोजगारांना 10 हजार रुपये महिना देणार, ज्येष्ठ नागरिक, विधवांना महिना 2100 रुपये देणार अशी अनेक आश्‍वासने निवडणूक प्रचारावेळी पंतप्रधान नरेंद्र मोदींनी दिली होती. त्यामुळे राज्यातील शेतकरी, लाडक्या बहिणी, तरुण, ज्येष्ठ नागरिक व सामान्य जनतेने मोदींच्या गॅरंटीवर विश्‍वास ठेऊन राज्यात महायुतीला प्रचंड बहुमताने सत्ता दिली, परंतु निवडून येताच राज्याचे उपमुख्यमंत्री व अर्थमंत्री अजित पवार यांनी राज्याची आर्थिक परिस्थिती डबघाईची असल्याचे कारण देत महायुतीच्या संकल्पनाम्यातील वरील सर्व आश्‍वासने पूर्ण करण्यास नकार दिला.

त्यामुळे शेतकरी, लाडक्या बहिणी, जनतेला महायुतीतील तिन्ही पक्षांनी संकल्पनामामध्ये दिलेल्या आश्‍वासनांची फसवणूक केल्याबद्दल 14 एप्रिल रोजी सकाळी 11 वाजता घनसावंगी तालुक्यातील बोरगाव खुर्द, बानेगाव, भोगगाव, भुतेगाव मासेगाव, सिंदखेड, भांदली, मंगरूळ या आठ गावातील प्रमुख चौकात महायुतीच्या संकल्पनाम्याची होळी करण्यात आली.