नॅरोगेजवरील स्लीपर बदलण्यासाठी 20 कोटींचा खर्च
। नेरळ । वार्ताहर ।
नेरळ-माथेरान या 21 किलो मीटर लांबीच्या नॅरोगेज रेल्वे मार्गावरील पूर्वी रुळावरून गाडी घसरणे, इंजिन रुळावरून खाली उतरणे असे अपघात होण्याचे प्रमाण वाढले होते.त्यामुळे या नॅरोगेज मार्गावर सिमेंटचे स्लीपर टाकण्याचे काम मध्य रेल्वेकडून मंजूर झाले आहे. त्या कामासाठी मध्य रेल्वे 20 कोटी खर्च करणार आहे, तर ते स्लीपर बदलण्याचे काम करणार्या मजुरांवर तब्बल एक कोटी 40 लाख इतका खर्च येणार आहे.
माथेरान येथील पर्जन्यमान लक्षात घेता दरवर्षी मिनीट्रेनच्या नॅरोगेज ट्रकच्या खालील माती वाहून जाण्याचे प्रकार घडत आहेत. त्यात मिनीट्रेनला सुरुवातीच्या काळात मातीचा भराव होता आणि त्याखाली लाकडी स्लीपर होते. कालांतराने त्या ठिकाणी खडी टाकून एक लोखंडी पट्टी असलेले स्लीपर 2000च्या दशकात टाकले गेले आणि त्यावेळी रूळ देखील बदलले गेले होते. असे अनेक उपाय करूनदेखील नेरळ-माथेरान मिनीट्रेनच्या ट्रॅकवर इंजिन रुळावरून घसरण्याच्या समस्या सुटत नव्हत्या.
शेवटी भारताच्या इतर भागात ज्याप्रमाणे मध्य रेल्वेच्या बहुतेक सर्व ब्रॉडगेज मार्गांवर ज्याप्रमाणे लाकडी स्लीपर काढून सिमेंटचे स्लीपर बसवले गेले आहेत. त्यामुळ अपघाताचे प्रमाण देखील कमी झाले आहे. हे लक्षात घेऊन मध्य रेल्वे ने नेरळ-माथेरान मिनीट्रेन मार्गावर सिमेंटचे स्लीपर बसविण्याचे धोरण हाती घेतले आहे. हे स्लीपर सोलापूर आणि मध्यप्रदेश येथून बनवून आणण्यात आले आहेत. त्यासाठी तब्बल 37500 स्लीपर यांची गरज असून, आतापर्यंत 17 हजार स्लीपर आणण्यात आले आहेत. यासाठी काही कोटी खर्च अपेक्षित आहे. माथेरान मिनिट्रेन 21 किलोमीटर घाटमार्गावर लोखंडी स्लीपर काढून सिमेंटचे स्लीपर लावण्याचे काम सुरू झाले आहे. हे काम जोपर्यंत पूर्ण होत नाही, तोपर्यंत मिनिट्रेन नेरळ-माथेरान मार्गावर अनिश्चित काळासाठी बंद राहणार आहे.
वर्षभरानंतर होणार मिनीट्रेन पूर्ववत
सिमेंटचे स्लीपर बसविण्याची मागणी करणारे माहिती अधिकार कार्यकर्ते जनार्दन पार्टे यांनी सिमेंट चे स्लीपर टाकण्यासाठी रेल्वे किती खर्च करणार आहे याबद्दल माहिती मागितली होती.21 किलोमीटर लांबीच्या अंतरावर सिमेंटचे स्लीपर टाकण्यासाठी रेल्वेकडून ठेका देण्यात आला आहे. त्यानुसार हा ठेका एक कोटी 38 लाख रुपयांना देण्यात आला आहे. नॅरोगेज मार्गावर 37500 स्लीपर टाकण्याचे काम मेसर्स अजय किसान प्रसाद मिश्रा या ठेकेदराला देण्यात आले आहे. तर एक वर्षाच्या आत ते सर्व सिमेंट स्लीपर नॅरोगेज ट्रॅकवर लावावे लागणार आहेत. मात्र, 2022 च्या अखेरीस किंवा 2023 मध्ये पर्यटकांची लाडकी मिनीट्रेन नॅरोगेज मार्गावर पुन्हा येणार आहे. त्यावेळी पर्यटकांसाठी प्रवासी वाहतूक सुरु होऊ शकते.
नवीन सिमेंट स्लीपर टाकल्याने नेरळ-माथेरान-नेरळ मिनीट्रेन अपघातमुक्त होईल, असा विश्वास आहे. त्यामुळे आपण सिमेंट स्लीपर टाकण्याची मागणी करीत होतो. केंद्र सरकारच्या बजेटमध्ये सिमेंट स्लीपर बनविण्यासाठी 5 कोटी 27 लाखांची तरतूद केली आहे.
जनार्दन पार्टे, कार्यकर्ते