हॉटेल कर्मचाऱ्याच्या मृत्यूचे गूढ

| पेण | प्रतिनिधी |

20 ऑगस्ट रोजी वाशीनाका येथील साई मराठा हॉटेलचा कर्मचारी हॉटेलच्या छतावरुन पडल्याची चर्चा सर्वत्र पेणमध्ये सुरु होती. मात्र, खरं काय हे समोर आलेच नाही. फक्त तर्क वितर्क सुरु होते. अखेर पेण पोलीस ठाण्यातील गुन्हा रजिस्टर क्रमांक 47/2025 चा डेली रिपोर्ट कृषीवलच्या हाती लागला असून, त्यात असलेली हकीकत आणि घडलेली बाब यामध्ये तफावत असल्याचे बोलले जात आहे. कारण खबर देणारे अमृत गावडे यांनी या घटनेतील मयत व्यक्ती रवींद्र भोसले हा बेशुध्द अवस्थेत रात्री 11 वाजता पडला असल्याचे सांगितले. परंतु, भ्रमणध्वनीवर अमृत गावडे याच्याशी संपर्क केला असता त्याचे पूर्ण नाव त्याला माहीत नसल्याचे सांगितले. तसेच मालकांच्या सांगण्यावरन फिर्याद दिल्याचे ही सांगितले.

प्रथमदर्शनी डॉक्टरांच्या म्हणण्यानुसार यातील मयत व्यक्ती हा उंचावरुन पडून डोक्याला मार लागल्याने मयत झाल्याचे म्हटले आहे, मग खबर देणार अमृत गावडे याने ही बाब का सांगितली नाही. तसेच दवाखान्यात आणण्याअगोदरच ही व्यक्ती मयत असल्याचे डॉक्टरांचेदेखील म्हणणे आहे. तसेच या हॉटेलचे मालक शरद पाटील असून, सदरचे हॉटेल हरिश शेट्टी आणि सतिश शेट्टी हे चालवत असल्याची माहिती भ्रमणध्वनीवरुन फिर्यादी अमृत गावडे याने कृषीवशी बोलताना दिली. तसेच जर हॉटेलमध्ये रवींद्र भोसले वेटर अथवा कुक म्हणून काम करत असेल, तर पूर्ण माहिती मालकांना असणे गरजेचे होते. परंतु, ही माहितीदेखील लपवल्याचे दिसत आहे. या गुन्ह्याचा अधिक तपास पोलीस निरीक्षक संदीप बागुल यांच्या मार्गदर्शनाखाली पोलीस उपनिरीक्षक सुनील चव्हाण करीत आहेत.