आयपीएलचा नवा नियम

मैदानावर आता 16 खेळाडूंनाच प्रवेश; सीमारेषेबाहेरील हालचालींवर निर्बंध

| नवी दिल्ली | वृत्तसंस्था |

‘बीसीसीआय’ने आयपीएल टी-20 क्रिकेट स्पर्धेतील यंदाच्या हंगामादरम्यान नवा नियम लागू केला आहे. या नियमानुसार, आता बेंचवर बसलेले खेळाडू सामन्यादरम्यान मैदानावर मुक्तपणे फिरू शकणार नाहीत. टीम शीटमध्ये समाविष्ट असलेल्या 16 खेळाडूंनाच मैदानावर एण्ट्री मिळणार आहे. इतरांना आता मैदानात प्रवेश दिला जाणार नाही.

ड्रिंक्स, बॅट किंवा संदेश पोहोचवण्यासाठी फक्त संघात समाविष्ट असलेल्या 16 खेळाडूंनाच मैदानात जाण्याची परवानगी असेल. अलीकडेच संघ व्यवस्थापनाला याबाबत सूचना देण्यात आल्या असून, या निर्णयामागील अधिकृत कारण अद्याप स्पष्ट करण्यात आलेले नाही. एका वेळेस बाउंड्री लाईनजवळ फक्त पाच खेळाडूंनाच उपस्थित राहता येणार आहे.

सामान्यतः आयपीएल संघात सुमारे 25 खेळाडू असतात. मात्र, प्रत्येक सामन्यासाठी केवळ 16 जणांची नोंद टीम शीटमध्ये केली जाते. नव्या नियमानुसार उर्वरित खेळाडूंना डगआउटमध्येच थांबावे लागेल. त्यांना बाउंड्री लाईन आणि एलईडी बोर्डदरम्यान वावर करण्यास मनाई असेल. संघातील सूत्रांच्या मते, ‘सब्स्टिट्यूट खेळाडूंना सामन्यादरम्यान मैदानावर फिरण्यास बंदी घालण्यात आली आहे. त्यांना ड्रिंक्स नेण्याचीही परवानगी नाही.’

आयपीएल 2026 च्या पार्श्वभूमीवर, बीसीसीआयने एक मोठा आणि कठोर निर्णय घेतला आहे, ज्याचा संघांच्या रणनीतीवर थेट परिणाम होऊ शकतो. आता, बेंचवर बसलेल्या खेळाडूंना सामन्यादरम्यान मैदानावर फिरता येणार नाही. नवीन नियमानुसार, संघ व्यवस्थापनाने अधिकृत संघ-यादीत समाविष्ट केलेल्या केवळ 16 खेळाडूंनाच सामन्यादरम्यान मैदानावर प्रवेश करण्याची परवानगी असेल. इतर खेळाडूंना मैदानावर प्रवेश करता येणार नाही, तसेच ते खेळाडूंपर्यंत पेय, बॅट किंवा कोणताही संदेश पोहोचवू शकणार नाहीत.

या नवीन नियमामागील नेमके कारण उघड झाले नसले तरी, सामन्यादरम्यान शिस्त राखण्यासाठी आणि अनावश्यक गोंधळ टाळण्यासाठी हे पाऊल उचलण्यात आले आहे, असे मानले जात आहे. इंडियन प्रीमियर लीग 2026 चे आतापर्यंत 74 पैकी 13 सामने खेळले गेले आहेत. 14 वा सामना दिल्लीत दिल्ली कॅपिटल्स आणि गुजरात टाइम्स यांच्यात खेळला जात आहे. बीसीसीआयचा हा नवीन नियम आयपीएलमधील शिस्त आणखी कडक करण्याच्या दिशेने एक मोठे पाऊल मानले जात आहे. तथापि, याचा संघांच्या मैदानातील संवाद आणि रणनीतीवरही परिणाम होऊ शकतो, ज्याचा परिणाम आगामी सामन्यांमध्ये स्पष्टपणे दिसून येईल.

सब्स्टिट्यूट खेळाडूंवरही मर्यादा
बिब्स (सब्स्टिट्यूट जर्सी) परिधान करून मैदानाच्या कडेला वावरणाऱ्या खेळाडूंची संख्या पाचपेक्षा जास्त असणार नाही. हे खेळाडू साधारणतः ड्रिंक्स नेणे किंवा बाउंड्रीवरून चेंडू परत करण्याचे काम करतात. हा नियम मॅच प्लेइंग पंडिशन्स (एमपीसी) मधील कलम 11.5.2 आणि 24.1.4 अधिक कडक करतो. कलम 11.5.2 नुसार खेळाडूंना ड्रिंक्स देण्याची परवानगी ठरावीक वेळ आणि अटींनुसार असते, तर कलम 24.1.4 नुसार मैदानाबाहेर असलेल्या खेळाडूंनी ट्रेनिंग बिब परिधान करणे बंधनकारक आहे.