विविध प्रकारच्या जातीच्या आकर्षक पक्षांची रेलचेल वाढली

झाडाझुडपांत बहुढंगी पक्ष्यांचे थवे

। उरण । वार्ताहर ।

उरण परिसरात रखरखत्या उन्हातही विविध प्रकारच्या जातीच्या आकर्षक पक्षांची रेलचेल वाढली आहे. उरण परिसरातील गाव व घर परिसरात अनेक प्रकारची झाडे आहेत. त्यामध्ये प्रामुख्याने आंबा, चिंच, कडूलिंब, वड, पिंपळ, करंज, ताड-माड, गुलमोहर, काट सावरीची झाडे, नारळी-पोफळी आदी झाडांचा समावेश आहे. अशा विविध प्रकारच्या झाडांच्या फांद्यांवर अनेक प्रकारचे आकर्षक पक्षी स्वच्छंदपणे बागडताना दिसू लागलग आहेत.

उरणमध्ये सध्या सुर्यपक्षी सहचारिणी सोबत चाफा, कन्हेरी या फुलांतील मध चोचीने गोळा करताना दिसत आहेत. तर, चित्रांग सारखे भांडखोर पक्षीही नजाकतीने दिसत आहेत. काही जातीचे पक्षी कळपाने विहार करत आहेत. तर, काही जातीच्या पक्षांचा रंग सभोवतालच्या परिस्थितीशी जुळणारा आहे. त्यामुळे असे पक्षी चटकन नजरेला दिसत नाहीत. मोकळ्या किंवा दाट झाडाझुडपांतही विविध रंगी बहुढंगी पक्ष्यांचे थवेही नजरेत पडत आहेत. धनेश सारखे पक्षी आसाम भागातुन येथे आले आहेत. त्याचबरोबर छोटे-मोठे स्थलांतरित पक्षी वड, पिंपळ, उंबर आणि इतर झाडांबरोबरच गावानजिक असलेल्या बागबगिच्यांमध्येही बागडताना आढळुन येत आहेत.पद्मपुष्प किंवा कस्तुर पक्षी देखील इकडे-तिकडे उड्या मारत फिरत आहेत. कस्तुर पक्षाला जास्त काळ उडता येत नसल्याने थोडे-थोडे अंतरच उडुन जाताना दिसत आहे.

त्याचबरोबर बुलबुल, साळुंकी, चिमणी, चित्रांगण, सुर्यपक्षी, खंड्या, सुरेल दयाळ, पोपट आदी पक्षी तर खिडकीच्या तावदाने, काचांवर चोची मारुन लक्ष वेधुन घेण्याचा प्रयत्न करीत आहेत. अधुनमधुन सुगरण, लाल मुनिया, गुलाबी पिंच, कालशिर्ष भारीट, पर्वत कलर, चिरक, दयाळ, छोटा सातभाई, नर्तक, कोतवाल, सुतार, बैरागी, शेंदरी विष्फुलिफ, कालशिर्ष भारीट, जेरडीनचा क्लोरॉप्सिस, पिपिट, करडा धोबी, चेस्टनट पोटाचा नटहॅच, फुलटोच्या गप्पीदास, राखी वटवट्या, शिंपी, कस्तुर, टकाचोर, राखी खाटीक, छोटा हिरवा राघू, तांबडा होला, हरतालिका, निलकंठ, नारद, भारव्दाज, ताम्रहंस आदी छोट्या-मोठ्या आकाराचे आकर्षक पक्षीही नजाकतीने डोकावून पाहाताना हमखास नजरेत पडू लागले आहेत.

उरण तालुक्यातील झाडे-झुडपे, बागबगीचे, गवताळ शेती, बांबुच्या वनात आकर्षक पाहुण्या पक्ष्यांची गर्दी वाढत आहे. अशा या जगात स्वैरविहार करणार्‍या रंगेबेरंगी विविध जातीच्या आकर्षक पक्ष्यांच्या मनमोहक हालचालींने परिसरातील वातावरणही चांगलेच उल्हासित झालेले दिसत आहे.