| पनवेल | विशेष प्रतिनिधी |
नैना प्रकल्प रद्द करा, जमिनी आमच्या हक्काच्या, नाही कुणाच्या बापाच्या अशा घोषणा देत पनवेल, उरण तालुक्यातील नैना प्रकल्पग्रस्तांनी गुरुवारी सिडको भवनवर धडक मारत हा प्रकल्प रद्द करण्याची मागणी केली.
नैना प्रकल्पाविरोधात गावोगावी यशस्वी पणे करण्यात आलेल्या गाव बंद आंदोलनानंतर देखील सरकारकडून आंदोलनाची हवी तशी दखल घेतली न गेल्याने आक्रमक झालेल्या आंदोलकांनी सिडको कार्यालयावर वाहन मोर्चा काढला. नैना प्रकल्पग्रस्त्र उत्कर्ष समिती आणि महाविकास आघाडीतील घटक पक्षाचे नेते, कार्यकर्ते या मोर्चात रखरखत्या उन्हात सहभागी झाल्याचे पाहायला मिळाले. सिडकोच्या नैना प्रकल्पा विरोधात तालुक्यातील प्रकल्पग्रस्त शेतकर्‍यांनी आक्रमक पवित्रा घेतला आहे. नैना प्रकल्प शेतकर्‍यांसाठी अन्यायकारक असल्याची भावना शेतकर्‍यांमध्ये असल्याने मागील काही दिवसापासून वेगवेगळ्या माध्यमातून आंदोलन करण्यात येत आहेत. गुरुवारी आयोजित वाहणाच्या मोर्चात देखील आंदोलकांचा प्रकल्पा विरोधातील रोष दिसून आला असला तरी मोठ्या प्रमाणात घोषणाबाजी करून प्रकल्पाविरोधातील रोष प्रकल्प ग्रस्तानी व्यक्त केला.
शहरातील छत्रपती शिवाजी महाराज्यांच्या पुतळ्याला अभिवादन करून सुरु करण्यात आलेल्या या मोर्चामध्ये माजी आ.बाळाराम पाटील, शिवसेना (ठाकरे) जिल्हाप्रमुख शिरीष घरत, जिल्हा सल्लागार बबन पाटील, काँग्रेसचे सुदाम पाटील, शेकाप तालुका चिटणीस राजेश केणी, माजी नगरसेवक रवींद्र भगत, गोपाळ भगत, शंकर म्हात्रे, प्रमोद भगत यांच्यासहित महाविकास आघाडीतील घटक पक्ष असलेल्या शेकाप, शिवसेना (ठाकरे), काँग्रेस, राष्ट्रवादी काँग्रेस पक्षाचे कार्यकर्ते आणि पदाधिकारी मोठ्या संख्येने उपस्थित होते. महाविकास आघाडीतील पक्षासोबतच दिल्ली आणि पंजाब राज्यात सत्तेवर असलेल्या आम आदमी पक्षाच्या कार्यकर्त्यांची संख्या देखील लक्षणीय होती.
मोर्चात सहभागी झालेल्या आंदोलकाकरिता अल्पोआहार आणि पाण्याची व्यवस्था आंदोलनात सहभागी झालेल्या ग्रामस्थांनीच केली होती. यामध्ये काही ग्रामस्थांनी तांदळाच्या भाकर्‍या आणि भाजी, तर काही ठिकाणी वडापाव तसेच पाण्याच्या बटल्यांची व्यवस्था करण्यात आली होती. रद्द करा रद्द करा, नैना प्रकल्प रद्द करा. नैना प्रकल्पची बाजू मांडणार्‍या खासदारांचा निषेध असो. जमीन आमच्या मालकीची, नाही कोणाच्या बापाची. देणार नाही, देणार नाही जमीन आमची देणार नाही अशा प्रकारची घोषणाबाजी केली जात होती. तसेच सध्याच्या सरकार विरोधात देखील घोषणाबाजी आंदोलक करत होते.
काळे झेंडे दाखवून निषेध
मोर्चात आपापली वाहन घेऊन सहभागी झालेल्या आंदोलकांनी आपल्या वाहनावर राजकीय पक्षांच्या झेंड्यासोबत नैना प्रकल्पाविरोधात रोष दर्शवण्यासाठी काळे झेंडे फडकवण्यात आले होते. त्याच सोबत आंदोलकांनी आपल्या वाहनावर काळ्या पट्ट्या बांधल्याचे पाहायला मिळाले. तर काही आंदोलक काळ्या पेहरावातच आंदोलनात सहभागी झाले होते.
टॅक्सी, रिक्षा, लक्झरी कार आणि दुचाकी
तालुक्यातील विविध गावांमधून सुरु झालेल्या वाहनांच्या मोर्चात मोर्चेकरी टॅक्सी, रिक्षा, दुचाकी आणि चारचाकी वाहन घेऊन सामील झाले होते. या वाहनामध्ये लाखो रुपये किमतीच्या लक्झरी कार अनेकांच्या आकर्षणाच्या केंद्र स्थानी असल्याचे पाहायला मिळाले.
पोलीस बंदोबस्त आणि वाहतूक कोंडी
आंदोलनाची घोषणा अगोदरच करण्यात आलेली असल्याने या वेळी पोलिसांचा प्रचंड बंदोबस्त असल्याचे पाहायला मिळाले. मोर्चासाठी सायन-पनवेल महामार्गावर काही प्रमाणात वाहतूक बदल करण्यात आल्याने महामार्गावर काही काळ वाहतूक कोंडीचे वातावरण निर्माण झाले होते. सांगोल्याचे माजी आमदार गणपतराव देशमुख यांचे नातू तथा शेकाप पुरोगामी युवक संघटनेचे प्रदेशाध्यक्ष डॉ. बाबासाहेब देशमुख हे देखील सिडको भावनांवरील प्रकल्प ग्रसतांच्या मोर्चात सहभागी झाले होते.
विद्यमान सरकार हे आंधळ्या बहिर्‍यांचे सरकार असून या सरकारला प्रकल्प ग्रस्तानवर होणारा अन्याय दिसत नसून, प्रकल्पग्रस्तांकडून अन्याया विरोधात फोडला जात असलेला टाहो ऐकू जात नाही. वाहन मोर्चाच्या माध्यमातून या आंधळ्या बहिर्‍या सरकारच लक्ष वेधून घेण्याचा प्रयत्न शेतकरी करत आहेत.
बाळाराम पाटील, माजी आमदार
शिष्टमंडळासमवेत चर्चा
वाहन मोर्चाने सिडको भवन येथे पोहचलेल्या आंदोलकांच्या शिष्टमंडळाने सिडकोचे अधिकारी राजेश पाटील यांची भेट घेतली आणि आपली भूमिका अधिकार्‍यांसमोर मांडली. या वेळी पाटील यांनी शिष्टमंडळाचे म्हणणे ऐकूण घेत ग्रामस्थांची भावना वरिष्ठ अधिकार्‍यांपर्यत पोहचवण्याची ग्वाही दिली. मात्र नैना प्रकल्प नकोच अशी भूमिका शिष्टमंडळाने घेतल्याने ग्रामस्थांनी सिडको अधिकार्‍यांसोबत एकत्र बैठक आयोजित करावी, त्यामध्ये नैना प्रकल्पतीला फायद्याची माहिती आम्ही देऊ. तसेच नैना प्रकल्पमधील अधिकारी पैसे मागत असतील तर त्या बाबत माहिती दिल्यास कारवाई करण्याची ग्वाही अधिकार्‍यांनी दिल्याची माहिती कॉग्रेस पक्षाचे नेते सुदाम पाटील यांनी दिली आहे.