नेरळ स्थानकातील सरकत्या जिन्याचे काम अंतिम टप्प्यात

| नेरळ | प्रतिनिधी |

मध्य रेल्वेवरील कर्जत एंडकडे असलेल्या नेरळ जंक्शन रेल्वे स्थानक येथे उभारण्यात येत असलेल्या सरकता जिन्याचे काम अंतिम टप्प्यात आहे. फलाट एकवर हा नवीन सरकता जिना बसविला जात असून त्या फलाटावर आणखी एक सरकता जिना असून तो सरकता जिना मुंबई दिशेकडे आहे.

मध्य रेल्वेच्या मेन लाईनवरील कर्जत दिशेकडे असलेल्या नेरळ जंक्शन स्थानकाचा कायापालट केला जात आहे. या स्थानकात प्रवासी वर्गाच्या सोयीसाठी नव्याने विकासकामे केली जात आहेत. ही विकासकामे करताना प्रवाशांची सोय याला प्राधान्य देण्यात आले आहे. नेरळ जंक्शन स्थानकातून माथेरानसाठी मिनीट्रेन सोडली जात असल्याने मोठ्या प्रमाणावर पर्यटनासाठी जाणारे पर्यटक यांची गर्दी असते. त्यात मुंबईकडून येणाऱ्या उपनगरीय लोकलमधून प्रवासी नेरळ स्थानकात अधिक संख्येने येत असतात. ही बाब लक्षात घेऊन नेरळ स्थानकात फलाट एकवर एकाच वेळी तीन पादचारी पूल तसेच सरकता जिना कार्यान्वित केला आहे. मात्र या स्थानकात उभारण्यात आलेला दुसरा सरकता जिना अद्याप कार्यान्वित झालेला नाही. हा सरकता जिना फलाटाच्या मध्यभागी असल्याने वृद्ध प्रवासी वर्गासाठी मदतगार ठरणार आहे.

मात्र नेरळ स्थानकातील प्रशासनाकडून हा सरकता जिना कार्यान्वित करण्यात आलेला नाही. त्यामुळे प्रवासी वर्गाकडून नेरळ रेल्वे प्रवासी संघटनेकडे सातत्याने मागणी होत असून मध्य रेल्वे प्रशासनाने तत्काळ सरकता जिना कार्यान्वित करावा, अशी मागणी नेरळ रेल्वे प्रवासी संघटना यांच्याकडून अध्यक्ष संदीप म्हसकर यांनी नेरळ स्थानक प्रबंधक गणपत पाटील यांच्याकडे करण्यात आली होती. त्यानंतर सरकता जिन्याचे काम अंतिम टप्प्यात नेले जात असून तेथे सध्या जिन्याच्या साफ सफाईची कामे कर्मचारी वर्गाकडून सुरू आहेत. त्यामुळे हा सरकता जिना लवकरच प्रवासी वर्गाच्या सेवेत येणार आहे.