कंटेनर अंगावर पडून कामगार ठार

| नवी मुंबई | वार्ताहर |

जासई येथील इपिक ग्लोबल सर्व्हिसेसच्या कंटेनर यार्डमध्ये कंटेनर अंगावर पडून कामगाराचा चिरडून मृत्यू झाल्याची घटना बुधवारी (दि.3) रात्री घडली. संदीप चौरसिया असे मृत कामगाराचे नाव आहे. चालकाच्या निष्काळजीमुळे ही घटना घडली आहे. उरण पोलिसांनी त्याच्याविरोधात गुन्हा दाखल करून त्याला ताब्यात घेतले आहे. ट्रेलरचालक असलेला संतोष आंधळे हा बुधवारी रात्री 8.30 वाजता कंटेनर यार्डमध्ये रिकामा कंटेनर ठेवण्यासाठी गेला होता. यावेळी चालक शिशिर खालखो हा ट्रेलरवरील रिकामा कंटेनर उचलून तो बाजूला ठेवत होता. त्याचवेळी कलमारच्या उजव्या बाजूचे लॉक तुटल्याने हा कंटेनर खाली उभ्या असलेल्या कामगार संदीप चौरसिया याच्या अंगावर पडला. त्याखाली चिरडून त्याचा जागीच मृत्यू झाला. उरण पोलिसांनी या घटनेला जबाबदार धरून खालखो याच्याविरोधात गुन्हा दाखल केला आहे. पुढील तपास पोलीस करीत आहेत.