उदय सामंतांना जाळून मारण्याची धमकी

नाना पटोलेंच्या सभेतला प्रकार

। रत्नागिरी । प्रतिनिधी ।

राज्याचे उद्योगमंत्री उदय सामंत यांना पोलिसांसमोरच जाळून मारण्याची धमकी देण्यात आली आहे. काँग्रेसचे प्रदेशाध्यक्ष नाना पटोले यांच्या राजापुरातल्या सभेमध्ये ही घटना घडली. रिफायनरीला विरोध करणार्‍या एका कार्यकर्त्याने नाना पटोले आणि पोलिसांसमोरच ही धमकी दिली. धमकी दिलेल्या या नेत्याचे नाव जोशी असल्याचे सांगितले जात आहे. त्याने दिलेल्या धमकीचा व्हिडीओ सध्या सोशल मीडियावर व्हायरल होत आहे. ही घटना पोलिसांनी गांभीर्याने घेतली असून या प्रकरणाची चौकशी सुरू केली आहे. याप्रकरणी रत्नागिरी पोलीस अधिक्षक मोहनकुमार गर्ग यांनी उदय सामंत यांच्याशी चर्चा केली आणि पुढील चौकशीची ग्वाही दिली.

सभेत रिफायनरीचे विरोधक उदय सामंतांच्या विरोधात आक्रमक झाल्याचे पाहायला मिळाले. रिफायनरी समर्थक आणि विरोधक यांनी राजापुरात नाना पटोले यांची भेट घेतली. यावेळी आपली भूमिका मांडत असताना रिफायनरी विरोधकांचा संताप अनावर झाला. त्यानंतर त्यातल्या जोशी यांनी उदय सामंत यांना जाळून मारण्याची धमकी दिली. त्यावेळी काँग्रेस प्रदेशाध्यक्ष नाना पटोले आणि पोलिसही उपस्थित होते.