होनाडमध्ये तीन उमेदवार बिनविरोध

ज्येष्ठ नागरिकांच्या प्रयत्नांना यश

| खोपोली | प्रतिनिधी |

खालापूर तालुक्यातील होनाड ग्रामपंचायतीच्या निवडणुकीत प्रभाग क्र.1 मधून सदस्यपदासाठी रिंगणात आलेल्या तीन उमेदवारांची बिनविरोध निवड करण्यात आली. यावेळी उमेदवारांसह ग्रामस्थानी आनंद साजरा केला.

होनाड ग्रामपंचायतीमधील प्रभाग क्र.1 मधील चिंचवळी गोहे येथील ज्येष्ठ ग्रामस्थांनी गावातील सर्व उमेदवारांना एकत्र घेत अंतर्गत ठराव करीत या गावाचे पुन्हा दोन तुकडे होऊ नये यासाठी प्रयत्न केले. त्यामुळे उमेदवारांनीही ज्येष्ठांच्या विचारांना साथ देत आपल्याला गावात सदस्यपदासाठी कोणतीही निवडणूक यापुढे होणार नाही, असा विश्वास दिल्याने त्वरित गावातील सर्व नागरिकांना हनुमान मंदिरात एकत्र करून आपल्या गावातील निवडणूक बिनविरोध करायची आहे असे विचार मांडले. ग्रामस्थांनाही ही कल्पना आवडल्याने त्यांनीही एकमताने सहमती दर्शवली आणि प्रभाग क्र.1 मध्ये ही निवडणूक बिनाविरोध करण्यात आली. यावेळी गणेश पाटील, आशा पाटील आणि वर्षा पाटील यांची एकमताने सदस्य पदासाठी निवड करण्यात आली, तर पूर्ण गावाने थेट सरपंच पदासाठी उमेदवार असलेले प्रकाश विठ्ठल पाटील यांना निवडून आणण्यासाठी प्रयत्न करण्याचे ठरविले.