ताडी-माडीची भेसळ जोमात; प्रशासन कोमात

| तळा | वार्ताहर |

तळा शहरात एसटी स्थानकाच्या मागील बाजूची ओळख आता ताडी-माडी विक्रीचे केंद्र म्हणून नव्याने नावारूपास येत आहे. दारू पिणे खिशाला परवडणारे नसल्याने तळीरामांनी आपला मोर्चा ताडी माडीकडे वळवला आहे. जीवनात मौज घेण्यासाठी तरुणांची ताडी-माडी पिणार्‍यांमध्ये भर पडली आहे. या ताडी-माडीत जास्तीत जास्त नशा निर्माण व्हावी यासाठी नवसागर, चूना अशा घातक रसायनांचा वापर केला जात असल्याची चर्चा या परिसरात मोठ्या प्रमाणात सुरू आहे.
दारू पिण्याची सुरुवात ही ताडी-माडीपासून होते. माडी हे औषध म्हणूनही लहान मुलांना पाजले जाते. मात्र, ती भेसळ केली जात असल्यामुळे फक्त नशेकरिता प्राशन केली जात आहे. परिणामी, तरुणांची ताडी-माडी पिण्याच्या संख्येत दिवसेंदिवस भर पडत आहे. दारूचे दर हे पन्नास-शंभर रुपयांपेक्षा अधिक असल्याने अनेकांना ते परवडत नाहीत. तुलनेने माडीचा अर्धा लीटरचा एक तांब्या तीस ते चाळीस रुपयांना मिळतो आणि नशा मात्र जवळजवळ दारू इतकीच असते. त्यामुळे सध्या या परिसरात दारूपेक्षा माडीचा धंदाच अधिक तेजीत चालतो. ताडी-माडी ज्या झाडातून काढली जाते, त्याच ठिकाणी विक्रेत्यांमध्ये ती विकली जाते. झाडावरून ताडी-माडी काढण्यापासून ते घशाखाली जाईपर्यंतच्या दोन-तीन टप्प्यांवर ताडी-माडीत भेसळ केली जात असल्याचे बोलले जात आहे. ताडी-माडीत भेसळ होत नसेल तर त्याची नशा जवळपास दारूसारखी कशी, असा सवाल परिसरातून यानिमित्ताने उपस्थित होत आहे. सध्याची भेसळयुक्त ताडी-माडी पिणारा तरुण हा उद्याचा तळीराम असण्याचीच शक्यता अधिक असते. ताडी माडीत होणार्‍या भेसळीमुळे माडीबाधा होऊन माणसे दगावण्याअगोदर पोलीस आणि अन्न व औषध प्रशासनासह सर्व संबंधित यंत्रणांनी याकडे लक्ष देण्याची गरज आहे.

ताडी-माडी पिण्यासाठी तळा एसटी स्थानक परिसरात लोक रोज येत असतात. या परिसरात ताडी-माडीची विक्री मोठ्या प्रमाणात सुरू असून, त्यामध्ये होणारी भेसळ ही माणसाच्या शरीराला हानिकारक आहे. पोलीस यंत्रणेची या व्यवसायाकडे होत असलेली डोळेझाक ही गंभीर बाब आहे. माडी ज्या ठिकाणी झाडावरून काढली जाते, त्या ठिकाणापासून ते विक्रेत्यांपर्यंत कोणावरही कोणत्याही प्रकारचे निर्बंध नसल्यामुळे त्यामध्ये नशिल्या पदार्थांचा मोठ्या प्रमाणात वापर होत आहे. याबाबत पोलीस आणि अन्न व औषध प्रशासन यांनी त्वरित कारवाई करावी, अशी मागणी जोर धरू लागली आहे.