स्थानिक व्यावसायिकांना मिळाली उभारी
| पाली/बेणसे | प्रतिनिधी |
गेल्या महिन्यात काही प्रमाणात पावसाने दडी मारल्याने पर्यटकांचा हिरमोड झाला होता. मात्र, मागच्या आठवडाभरात पावसाने पुन्हा एकदा दमदार हजेरी लावल्याने जिल्ह्यात पावसाळी पर्यटन बहरले आहे. शिवाय, ट्रेकिंगदेखील जोरात आहे. परिणामी, स्थानिक व्यावसायिकांना उभारी मिळाली आहे.
जिल्ह्यातील विविध ठिकाणचे पांढरे शुभ्र धबधबे व धरणांचे पाणी ओसंडून वाहू लागले आहे. कुंडलिका, अंबा, उल्हास, सावित्री, पाताळगंगा व गाढी आदी नद्या देखील दुथडी भरल्या आहेत. डोंगरावरून खळखळत वाहत येणार्या जलधारांना जोर आला आहे. आणि हे सर्व पर्यटकांना आकर्षित करतात. शिवाय सुधागड, सरसगड, रायगड, मानगड, अवचितगड, मृगगड आदी गडकिल्ले व डोंगरांवर ट्रेकिंग देखील होत आहे. शनिवारी तसेच मागील रविवार ते मंगळवारी भिरा-पाटणुस गावाजवळील देवकुंड तसेच ताम्हिणी घाटात पर्यटक व ट्रेकर्सनी मोठ्या प्रमाणात गर्दी केली होती. पुढील काही दिवसांत अजूनही पर्यटकांचा ओघ वाढण्याची शक्यता आहे.
सह्याद्रीच्या उंच आणि रांगड्या डोंगररांगांनी वेढलेल्या व निसर्गसौंदर्याने नटलेल्या रायगड जिल्ह्यात सप्टेंबर महिन्याच्या मध्यावरदेखील पावसाळी पर्यटनाचा आनंद मिळत असल्याने पर्यटकांना ही जणू काही पर्वणीच आहे. येथील धबधबे, वाहते पाण्याचे प्रवाह व धरणाच्या पाण्याचा ओव्हरफ्लोमध्ये चिंब भिजण्याचा व मनसोक्त पावसाचा आनंद पर्यटक घेत आहेत. शिवाय, धुक्याचे वातावरण पर्यटकांना धुंद करते. याबरोबरच काही युट्युबर्स व ब्लॉगर देखील येथील निसर्गसौंदर्य जगासमोर आणत आहेत. नाशिक येथील भावना फुलझेले यांनी 13 सप्टेंबरला भरपावसात देवकुंड ट्रेक केला. त्यांच्यासोबत आणखी 20 महिला देखील होत्या. मुसळधार पाऊस, वाहते पाणी, उंचावरून कोसळणारा देवकुंड धबधबा, 16 किमी पायी चालणे, आल्हाददायक निसर्ग, धुके, सह्याद्रीच्या रांगा या सगळ्याचा आनंद या महिलांनी घेतला. शिवाय वेगळा थरार देखील अनुभवला.
कोट
पावसाला पुन्हा सुरुवात झाल्याने पर्यटकांचा ओघ वाढत आहे. मुंबई-पुणे आदी शहरांतील ट्रेकर्स व पर्यटक देवकुंड व ताम्हणी घाटाला पसंती देत आहेत. परिणामी, येथील छोटे-मोठे व्यावसायिक व गाईडदेखील सुखावले आहेत.
आंदेश दळवी,
माजी उपसरपंच व व्यावसायिक, पाटणूस
सप्टेंबर महिन्यात पावसाने दमदार हजेरी लावली आहे. त्यामुळे पुन्हा एकदा रायगड जिल्ह्यात पावसाळी पर्यटनाचा बेत आखला आहे.
प्रवीण यादव, तरुण पाली
(छायाचित्र, धम्मशील सावंत,पाली /बेणसे)