| पनवेल | वार्ताहर |
केंद्र शासनामार्फत ‘स्वच्छ भारत’ अमृत महोत्सवानिमित्ताने खारघरमध्ये सायकल रॅली, कळंबोली पनवेलमध्ये पदयात्रा आणि स्वच्छता मोहिमेचे आयोजन महापालिकेच्यावतीने करण्यात आले होते. पनवेल महापालिका मुख्यालय ते वडाळे तलाव पदयात्रेस आमदार प्रशांत ठाकूर, आयुक्त गणेश देशमुख, माजी सभागृह नेते परेश ठाकूर, माजी विरोधीपक्ष नेते प्रीतम म्हात्रे, टेबल टेनिसपटू स्वस्तिका घोष, उपायुक्त सचिन पवार, लेखा परिक्षक निलेश नलावडे, सहाय्यक आयुक्त डॉ.वैभव विधाते, माजी नगरसेवक, नगर सेविका उपस्थित होत्या.
केंद्र शासनामार्फत स्वच्छ अमृत महोत्सव पनवेल महापालिका क्षेत्रात राबविण्यात येणार आहे. या उपक्रमांतर्गत इंडियन स्वच्छता लीग स्पर्धेचे आयोजन करण्यात आले आहे. शहराच्या स्वछतेमध्ये तरूणांचा सहभाग वाढवा, शहराशी आपुलकीचे नाते निर्माण व्हावे दृष्टीने या उपक्रमांनिमित्ताने खारघरमध्ये सायकल रॅली, कळंबोली पनवेलमध्ये पदयात्राचे आयोजन करण्यात आले होते. ‘इंडियन स्वच्छता लीगच्या’ रॅलीमध्ये विविध महाविद्यालये, शाळा, विविध पर्यावरण संघटना, नागरिकांनी मोठ्या संख्येने सहभाग घेतला.
केंद्र शासनाच्या निर्देशाप्रमाणे ‘स्वच्छ भारत’ अभियानाची पनवेल महानगरपालिका हद्दीमध्ये प्रभावी अमंलबजावणी सुरु आहे. केंद्र शासनाच्यावतीने राबविण्यात येणार्या ‘इंडियन स्वच्छता लीग’ उपक्रमांतर्गत पनवेल महानगरपालिकेने आपली ‘पनवेल चॅम्पियन्स’ ही टिम तयार केली आहे. आंतरराष्ट्रीय टेबल टेनिसपटू स्वस्तिका घोष ही या टिमची कॅप्टन आहे.
खारघरमध्ये उपायुक्त विठ्ठल डाके आणि उपायुक्त गणेश शेटे यांच्या उपस्थित उत्सव चौक ते गुरूद्वारा सायकल रॅलीचे आयोजन करण्यात आले होते. या सायकल रॅलीस तरुणांचा मोठा प्रतिसाद मिळाला. याचबरोबर कळंबोली प्रभागात उपायुक्त कैलास गावडे आणि लेखाधिकारी मंगेश गावडे यांच्या उपस्थितीत कळंंबोलीमध्ये बस डेपो ते एम जी एम रुग्णालय पदयात्रा काढण्यित आली. यामध्ये जवळपास दीड हजार शालेय विद्यार्थी आणि तरुणांनी सहभाग घेतला.
विविध शाळांचा समावेश
पनवेल प्रभातफेरीमध्ये सी के टी कॉलेज, आय टी एम कॉलेज, बाठीया हायस्कूल, नवीन पनवेल, ब्रांझ हायस्कूल, कळसेकर कॉलेज, व्ही के हायस्कूल, केवी कन्या शाळेच्या विद्यार्थ्यांनी सहभाग घेतला. कळंबोली मधील प्रभातफेरीमध्ये सुधागड विद्यालय, केलई महाविद्यालय, सेंट जोसेफ विद्यालयाच्या विद्यार्थ्यांनी सहभाग घेतला. खारघरमधील सायकल रॅलीत लोकनेते रामशेठ पब्लिक स्कूल, सरस्वती स्कूल एन एस एस ग्रुप, तेरणा कॉलेज, सुधागड विद्यालय कोपराच्या विद्यार्थ्यांनी सहभाग घेतला.