नेरळ गोळीबार प्रकरणी दोघांना अटक

| नेरळ | प्रतिनिधी |

नेरळ पोलीस ठाण्याच्या हद्दीत धामोते भागातील पेशवाई रस्त्यावरील पुलावर 25 नोव्हेंबराच्या रात्री सचिन अशोक भवर या व्यक्तीवर दुचाकीवरून आलेल्या तरुणांनी गोळीबार केला होता. याप्रकरणी नेरळ पोलिसांनी नाशिक येथील दोन आरोपींना ताब्यात घेतले आहे. त्या आरोपीमधील अविनाश जगन्नाथ मार्के याच्यावर खून, खुनाचा प्रयत्न, दरोडा, चोरी असे विविध 15 गुन्हे दाखल आहेत.

धामोते येथील श्री स्वामी समर्थ चाळीमध्ये राहणारे सचिन अशोक भवर हे नोकरीच्या ठिकाणावरून घरी परत येत असताना पिशवी रस्त्यावर गोळीबार करण्यात आला होता. स्कुटी घेऊन घरी परत येत असताना सचिन भवर यांचा बदलापूर येथून पाठलाग करणाऱ्या विनायक मार्के आणि त्याच्या साथीदाराने सील्वर रंगाची सी.बी. झेड मोटारसायकल क्र. एम.एच.15 डी.ई.8518 वरून येऊन सचिन भवर यांच्यावर गोळीबार केला होता. हा गुन्हा पूर्ववैमस्यातून घडला असल्याचे तपासात निष्पन्न झाले आहे. या गुन्ह्याचा तपास लागावा यासाठी कर्जत पोलीस ठाणे व नेरळ पोलीस ठाण्याकडील संयुक्त तपास पथके तयार करण्यात आली होती. या गुन्ह्यातील आरोपपींचा तांत्रिक विश्लेषणाद्वारे तपास करून आरोपीपर्यंत नेरळ पोलिसांचे पथक पोहोचले.

गुजरात व नाशिक परिसरात असल्याबाबतची माहीती मिळत होती. परंतु, आरोपीत हे सराईत गुन्हेगार असल्याने ते सतत त्यांचे वास्तव्य बदलत होते. यातील आरोपीत अविनाश जगन्नाथ मार्के हा संगमनेर खुनाच्या गुन्ह्यातून मागील पाच वर्षांपासून फरारी आहे. त्यामुळे आरोपींचा शोध घेणे अतिशय आव्हानात्मक होते. नेरळ पोलीस ठाण्याचे प्रभारी अधिकारी शिवाजी ढवळे यांनी आपल्या नेरळ पोलीस ठाण्याच्या गुन्हे प्रकटीकरण पथकाकडे जबाबदारी दिली. पोलीस उपनिरीक्षक सुशील काजरोळकर, सुशांत वरक, पोलीस हवालदार स्वप्नील येरुणकर, सचिन वाघमारे, पोलीस हवालदार राजाभाऊ केकाण, आशु बेंद्रे आणि विनोद वांगणेकर यांच्या पथकाने नाशिक परिसरात आठ दिवस तळ ठोकून तेथे तपास पथकाने त्या आरोपींच्या वास्तव्याबाबत अतिशय शिताफीने पाठलाग करून दि. 5 डिसेंबर रोजी पकडले. आरोपींकडून गुन्ह्यात वापरलेले गावठी कट्टा, राऊंड व सी.बी. झेड मोटारसायकल क्र. एम.एच.1 डी.ई.8518 डी.ई.8518 असा मुद्देमाल हस्तगत करण्यात आला आहे. याप्रकरणी अविनाश जगन्नाथ मार्के आणि दिपक विनायक कोळेकर यांना नाशिक येथून ताब्यात घेतले असून, त्यांना न्यायालयाने 10 डिसेंबरपर्यंत पोलीस कोठडीत ठेवण्याचे आदेश दिले आहेत.