घातक शस्त्रांसह दोघांना अटक

। पनवेल । वार्ताहर ।

पनवेल तालुक्यातील तळोजा येथील पेंधर भागातून दोघांना शस्त्रांसह अटक करण्यात आली. अमरनाथ योगेंद्र सिंग (21) व अभिषेक अनिरुद्ध सिंग (26) अशी या दोघांची नावे असून गुन्हे शाखेने या दोघांकडून एक गावठी कट्टा, दोन जिवंत राऊंड, टॉय पिस्टल व एक सुरा अशी घातक शस्त्रे जाप्त केली आहेत. या दोघांनी हा गावठी कट्टा व जिवंत राऊंड कुठून व कुणाला विक्री करण्यासाठी आणले होते, याची पोलिसांकडून अधिक चौकशी करण्यात येत आहे.

तळोजा पेंधर फाटा येथील सीएनजी पंपाजवळ दोन व्यक्ती पिस्तूल विक्री करण्यासाठी येणार असल्याची माहिती गुन्हे शाखा युनिट-3चे वरिष्ठ पोलीस निरीक्षक पराग सोनवणे यांना मिळाली होती. या माहितीच्या आधारे गुन्हे शाखेच्या पथकाने तळोजा पेंधर फाटा येथील सीएनजी पंपाजवळ सापळा लावला होता. पहाटे तीन वाजण्याच्या सुमारास या ठिकाणी अमरनाथ सिंग व अभिषेक सिंग हे दोघे संशयास्पदरीत्या आले असताना, गुन्हे शाखेने दोघांची धरपकड केली. त्यानंतर पोलिसांनी त्यांची झडती घेतली असता, अमरनाथ सिंगजवळ लोखंडी गावठी कट्टा व एक जिवंत राऊंड सापडले. तसेच अभिषेक सिंगजवळ एक चायना मेड खेळण्यातले पिस्तूल (टॉय पिस्टल) व एक जिवंत राऊंड, एक सुरा आढळला. त्यानंतर गुन्हे शाखेच्या पथकाने या दोघांकडे पिस्तूल व राऊंडबाबत चौकशी केली असता, त्यांनी उडवाउडवीची उत्तरे दिली. त्यानंतर गुन्हे शाखेने या दोघांविरोधात तळोजा पोलीस ठाण्यात विनापरवाना गावठी कट्टा व दोन जिवंत राऊंड बेकायदेशीररीत्या बाळगल्याप्रकरणी आर्म अ‍ॅक्टनुसार गुन्हा दाखल करून दोघांना अटक केली आहे.