धीरजला तिरंदाजीत दोन सुवर्णपदके

| नवी दिल्ली | वृत्तसंस्था |

भारतीय स्टार तिरंदाज धीरज बोम्मादेवराने तिरंदाजी विश्वचषक स्पर्धेत एकाच दिवशी दोन सुवर्णपदकं जिंकून शानदार कामगिरी करत इतिहास रचला. धीरजने प्रथम कुमकुम मोहोडसोबत रिकर्व्ह मिश्र सांघिक प्रकारात सुवर्णपदक जिंकलं आणि काही तासांनंतर त्याने पुरुषांच्या वैयक्तिक रिकर्व्ह प्रकारातही सुवर्णपदक पटकावले. जागतिक क्रमवारीत 18व्या स्थानावर असलेल्या आणि भारतीय सैन्याचा तिरंदाज असलेल्या धीरजनं अंतिम सामन्यात दक्षिण कोरियाचा स्टार तिरंदाज आणि पॅरिस ऑलिम्पिक कांस्यपदक विजेता ली वू-सेओकचा 7-3 असा पराभव करुन आपल्या कारकिर्दीतील पहिलं वैयक्तिक तिरंदाजी विश्वचषक सुवर्णपदक जिंकले.

धीरजने सामन्याची शानदार सुरुवात केली आणि पहिले दोन सेट 30-29 आणि 29-28 असे जिंकून 5-1 अशी आघाडी घेतली. तिसरा सेट 27-27 असा बरोबरीत सुटला. चौथ्या सेटमध्ये ली वू-सेओकनं पुनरागमन करण्याचा प्रयत्न केला आणि 29-27 असा सेट जिंकून 5-3 अशी आघाडी घेतली. मात्र, दबावाखालीही धीरज शांत राहिला. निर्णायक सेटमध्ये, त्याने एका  ‘X’ सह सलग तीन अचूक 10 गुण मिळवून सामना 7-3 नं जिंकला.

अंतिम फेरीत पोहोचण्यापूर्वी, धीरजने उपांत्य फेरीत जर्मनीच्या मॉरिट्झ वायझरचा 6-4 ने पराभव केला. सामन्याची सुरुवात त्याच्यासाठी खराब झाली, त्याने पहिला सेट 26-27 नं गमावला. पुढील दोन सेट 28-28 असे बरोबरीत सुटले, ज्यामुळं धीरज 2-4 नं मागे पडला. स्पर्धेतून बाहेर पडण्याच्या मार्गावर असताना, धीरजने जबरदस्त पुनरागमन केलं आणि चौथा सेट 30-27 ने जिंकला. निर्णायक सेटमध्ये जर्मन तिरंदाजाच्या एका चुकीचा फायदा घेत, धीरजनं 9, 10 आणि 9 गुणांसह तो सेट 28-23 ने जिंकला आणि आपल्या पहिल्या विश्वचषक अंतिम फेरीत आपलं स्थान निश्चित केले.