भरधाव कारने दोघांना उडवले; एकाचा मृत्यू

| नवी मुंबई | प्रतिनिधी |

नवी मुंबईच्या तळोजा एमआयडीसीमध्ये भीषण अपघात झाला आहे. या अपघातात एका कारने रस्त्यावरुन चालत जाणाऱ्या दोघांना उडवले आहे. ही घटना रस्त्यावरील सीसीटीव्ही कॅमेऱ्यामध्ये कैद झाली आहे. अपघातामुळे परिसरात हळहळ व्यक्त केली जात आहे.

आज (दि.14) नवी मुंबईतील तळोजा एमआयडीसी येथील शिवजागृती हॉटेलसमोर भीषण अपघात झाला आहे. भरधाव कारने रस्त्यावरुन जाणाऱ्या दोघांना उडवले आहे. रस्त्याच्या सीसीटीव्हीमध्ये भीषण अपघात कैद झाला आहे. व्हिडीओमध्ये रस्त्यावरुन एक महिला आणि एक तरुण रस्त्याच्या कडेने चालत जात असल्याचे दिसते. काही क्षणातच कार महिला आणि तरुणाला उडवून पुढे जाते. भरधाव येणारी कार महिलेने पाहिली होती. ती बाजूला जाणार इतक्याने कारने झडप घातली. या दुर्घटनेमध्ये तरुणाचा मृत्यू झाला आहे. तर महिला गंभीररित्या जखमी झाली आहे. जखमी महिलेवर सध्या कामोठे येथील एमजीएम रुग्णालयात तिच्यावर उपचार सुरु आहेत. महिलेची प्रकृती गंभीर असल्याचे डॉक्टरांनी म्हटले आहे. वाहनचालक वेगाने कार चालवत होता. कार चालवत असताना नियंत्रण सुटल्याने वाहनचालकाने त्या दोघांना उडवले असल्याची प्राथमिक माहिती समोर आली आहे. दरम्यान या अपघाताप्रकरणी तळोजा पोलीस ठाण्यात वाहनचालकाच्या विरोधात गुन्हा दाखल करण्यात आला आहे. तळोजा पोलिसांनी या घटनेचा अधिक तपास सुरु केला आहे.