कळंबोली सर्कल येथे अपघातामध्ये दुचाकीस्वाराचा मृत्यू 

| पनवेल | प्रतिनिधी |

कळंबोली सर्कल परिसरात झालेल्या अपघातात 42 वर्षीय दुचाकीस्वाराचा मृत्यू झाला. फूरकान नासीर पटेल असे मृत व्यक्तीचे नाव असून कंपनीतून काम संपवून घरी परत येत असताना हा अपघात घडला.

पनवेल शहरातील पटेल मोहल्ला येथे राहणारे 42 वर्षीय फूरकान पटेल हे  तळोजातील इव्हेंट मॅनेजमेंट कंपनीतून काम संपवून घरी परत येत असताना कळंबोली सर्कलजवळील उड्डाणपुलावरून खाली उतरल्यानंतर त्यांच्या दुचाकीला मागून येणाऱ्या भरधाव ट्रकने जोरदार धडक दिली. या धडकेत ते गंभीर जखमी झाले. घटनास्थळी उपस्थित वाहनचालक व वाहतूक पोलिसांनी त्यांना तातडीने नानासाहेब धर्माधिकारी उपजिल्हा रुग्णालयात दाखल केले; मात्र डॉक्टरांनी त्यांना मृत घोषित केले. दरम्यान, या प्रकरणी कळंबोली पोलीस ठाण्यात गुन्हा नोंदविण्यात आला असून सहाय्यक पोलीस निरीक्षक दत्तात्रय डफळ यांनी ट्रक चालक पांडुरंग गुजले (24) याला ताब्यात घेतले आहे.