| अलिबाग | विशेष प्रतिनिधी |
अलिबाग शहरात गेल्या काही महिन्यांपासून ‘बाईक ऑन रेंट’ हा व्यवसाय मोठ्या प्रमाणात सुरू झाला आहे. मात्र, बाईक ऑन रेंट या व्यवसायाविरोधात अलिबाग ऑटो रिक्षा व्यावसायिकांनी पेण येथील उपप्रादेशिक परिवहन अधिकारी यांच्याकडे निवेदन सादर केले आहे.
अलिबाग ऑटो रिक्षा व्यावसायिकांनी पेण येथील उपप्रादेशिक परिवहन अधिकारी यांच्याकडे सादर केलेल्या निवेदनात नमूद केले आहे की, अलिबाग शहरात गेल्या काही महिन्यांपासून ‘बाईक ऑन रेंट’ हा व्यवसाय सुरू झाला आहे. सदर दुकानात मोटारसायकल येणाऱ्या पर्यटकांना भाड्याने दिली जातात. सदर व्यावसायिकांनी कुठूनही कसले परवानेसुद्धा काढलेले नसून सदरचा व्यवसाय हा आमच्या माहिनीनुसार अनधिकृत आहे.
या व्यवसायामुळे आमच्या रिक्षा व्यवसायावर विपरीत परिणाम झालेला असून, सद्यःस्थितीनुसार आम्हास आमचे कर्जसुद्धा फेडता येत नाही. एवढेच नव्हे तर, कुटुंबाचा उदरनिर्वाहसुद्धा भागविता येत नाही. तरी सदर प्रकारचे चालणारे अनधिकृत व्यवसाय आपल्यातर्फे पाहणी करून त्यांच्यावर योग्य ती कायदेशीर कारवाई करून बंद करण्यात यावी, जेणे करून रिक्षा व्यवसाय व्यवस्थितपणे चालेल.