रोहा नगरपालिका प्रशासन अनभिज्ञ; हेतुपूर्वक दुर्लक्ष
। रोहा । प्रतिनिधी ।
रोहयाच्या कुंडलिका नदी संवर्धन प्रकल्पाच्या जागेत दुकानगाळे बांधून त्यांची बेकायदेशीरपणे विक्री करण्याचे प्रयत्न काही पुढार्यांनी येथे केले आहेत. याबाबत नागरिकांकडून संताप व्यक्त होताच रोहा नगर पालिकेचे मुख्याधिकारी यांनी सोमवारी (दि.29) जागेवर जाऊन कारवाई करीत अतिक्रमण हटविण्यासाठी 2 दिवसांची मुदत संबंधितांना दिली.
नगरपालिकेच्या महत्वाकांक्षी प्रकल्पात बेकायदेशीर बांधकामे उभी राहत असताना नगरपालिका प्रशासन अनभिज्ञ होते की हेतुपूर्वक दुर्लक्ष केले जात होते असा सवाल उपस्थित होत असून याबाबत रोहा सिटीझन फोरम यांनी तक्रार केली आहे.
रोहयाच्या कुंडलिका नदीतीरी सुमारे 30 कोटी रुपये निधी खर्च करून नदी संवर्धन प्रकल्पाचे काम करण्यात आले आहे. गेल्या सप्ताहात या प्रकल्पाच्या जागेमध्ये हॉटेल रोहा प्राईड समोरील भागात कायमस्वरूपी दुकान गाळे उभे करण्यात आले होते. दर दिवशी तेथे दुकाने वाढत चालली होती. रोहा शहरात हे बेकायदेशीर गाळे उभे करून त्यांची 85 हजार रुपयांना विक्री केली जात असल्याची माहिती सोशल मीडियावर पसरताच नागरिकांमधून संताप व्यक्त होऊ लागला होता.आगामी नगरपालिका निवडणुकीची बेगमी या अनधिकृत टपर्यांच्या माध्यमातून करण्यात येत असल्याची देखील चर्चा रंगली आहे. यामध्ये दोन मोठ्या पुढार्यांचा सहभाग असल्याने मुख्याधिकारी कारवाई करीत नसल्याची चर्चा शहरात सर्वत्र पसरली.
23 ऑगस्ट रोजी रोहा नगर पालिकेचे मुख्याधिकारी यांना याबाबत पत्र पाठविण्यात आल्यानंतर पालिकेची सूत्रे हलली. शुक्रवारी पालिकेतर्फे संबंधितांना 2 दिवसांची मुदत देणारी नोटीस देण्यात आली होती. सोमवारी सकाळी रोहा सिटीझन फोरमने मुख्याधिकारी रोहा यांना पत्र पाठवून या बेकायदेशीर टपर्यांवर आपण तात्काळ कारवाई करावी व हे अतिक्रमण दूर करून नदी संवर्धन प्रकल्पाचे करण्यात येणारे विद्रुपिकरण तातडीने थांबविण्यात यावे अशी मागणी फोरमचे अध्यक्ष नितिन परब व निमंत्रक प्रदीप देशमुख यांनी केली.
दरम्यान मुख्याधिकारी धीरज चव्हाण यांनी पालिकेचे कर्मचारी, पोलीस बळ आणि जेसीबी सोबत घेऊन प्रत्यक्ष जागेवर जाऊन कारवाई करण्याचे प्रयत्न केले. परंतु यावेळी संबंधितांनी व टपरीधारक यांनी सर्व माल व टपर्या 2 दिवसात उचलून नेण्याचे कबूल केल्याने सदर कारवाई दोन दिवस स्थगिती ठेवण्यात आल्याचे मुख्याधिकारी चव्हाण यांनी सांगितले आहे. या अतिक्रमणामुळे नदी संवर्धन प्रकल्पाच्या जागेचे विद्रुपीकरण झाले असून या प्रकल्पाचे अस्तित्वच धोक्यात आले आहे. एकूणच प्रकार संशयास्पद असून रोहा नगरपालिका प्रशासन याबाबत खरोखरच अनभिज्ञ होते की हेतुपूर्वक दुर्लक्ष करत होते असा सवाल मात्र या निमित्ताने उपस्थित होत आहे.
अनधिकृत टपर्या हलवण्याबाबत शुक्रवारी जागामालकांना 2 दिवसांची मुदत देणारी नोटीस दिली होती. त्या अनुषंगाने सोमवारी 11 वाजता कारवाई नियोजित होती. अतिक्रमण निर्मूलन वेळी संबंधितांनी व टपरी धारक यांनी सर्व माल व टपर्या 2 दिवसात उचलून नेण्याचे कबूल केले आहे.
धीरज चव्हाण -मुख्याधिकारी, रोहा नगर परिषद
रोहा शहराला बेकादेशीर बांधकामांचा विळखा बसत आहे. अवधूत तटकरे हे नगराध्यक्ष असताना शहरातील बेकादेशीर बांधकामे व अतिक्रमणांवर कोठार कारवाई केली जात होती. परंतु आता प्रशासनाची भूमिका पाहून साशंकता निर्माण होते. ठोस कारवाई न करता प्रशासन संबंधितांना अप्रत्यक्ष मदत करतानाच अधिक दिसत आहे.
प्रशांत देशमुख, सामाजिक कार्यकर्ते, रोहा